مفت کھانےکیلئے پارٹیز میں رقص کرتا تھا، متھن چکرورتی
بالی ووڈ کے معروف اداکار مِتھن چکرورتی نے اپنے کیریئر کے ابتدائی دنوں کی مشکلات کا ذکر کرتے ہوئے بتایا کہ ایک وقت ایسا بھی تھا جب وہ مفت کھانا حاصل کرنے کے لیے پارٹیوں میں رقص کیا کرتے تھے۔
اداکار نے فرح خان کے یوٹیوب وی لاگ میں گفتگو کرتے ہوئے بتایا کہ اداکاری میں کامیابی سے قبل انہیں انتہائی مشکل حالات کا سامنا کرنا پڑا۔ مِتھن کے مطابق وہ کئی مرتبہ سڑکوں، فٹ پاتھ اور باغات میں سوئے۔
انہوں نے کہا کہ بعض اوقات پیدل چلتے ہوئے وہ اتنے تھک جاتے تھے کہ فٹ پاتھ پر ہی سو جاتے اور آنکھ کھلنے پر خود کو وہیں پاتے۔
فرح خان نے مِتھن کے ابتدائی دنوں کو یاد کرتے ہوئے بتایا کہ ان کے ماموں کے کے شکلا امیتابھ بچن کے لیے فلمیں لکھا کرتے تھے اور مِتھن ان کی پارٹیوں میں صرف اس لیے رقص کرنے آتے تھے تاکہ رات کا کھانا مل سکے۔
