اپوزیشن نےآصف زرداری،بلاول بھٹوپرسندھ کاپانی بیجنےکاالزام لگادیا
قومی اسمبلی میں اپوزیشن لیڈرعمر ایوب نے الزام عائد کیا ہے کہ آصف زرداری ہو یا بلاول بھٹو دونوں سندھ کا پانی بیچنے جا رہے ہیں۔
پارلیمانی سال کے آغاز پرپارلیمنٹ کے مشترکہ اجلاس سے خطاب میں صدر آصف زرداری نے ارکان پارلیمنٹ کو قومی مفاد کو بالاتر رکھنے اور ذاتی و سیاسی اختلافات پشت ڈال کر معیشت کی بحالی، جمہوریت کے استحکام اور قانون کی حکمرانی کے لیے مل کر کام کرنے کی دعوت دی۔
پارلیمنٹ ہاؤس میں پریس کانفرنس کے دوران اپوزیشن لیڈر عمر ایوب کا کہنا تھا کہ آصف زرداری خود کو صدر کہتے ہیں لیکن ہم اس انسٹالڈ حکومت کو نہیں مانتے، آصف علی زرداری نے آج کوئی اچھی بات نہیں کی۔یہ پیکا ایکٹ میں فارم 47 کی حکومت کے ساتھ کھڑے رہے، موجودہ حکومت اقتصادی طور پر ناکام ہوچکی ہے، کرپشن انتہا پر ہےاور یہ خوشیاں منا رہے ہیں کہ مہنگائی کم ہوگئی ہے، آئیں ہمارے ساتھ چلیں اورپتا کریں کہ مہنگائی کم ہوئی ہے یا بڑھی ہے۔
عمر ایوب کا کہنا تھا کہ بلوچستان میں 3 دن سے لاک ڈاؤن ہیں، خیبرپختونخوا میں حالات انتہائی خراب ہیں، بہادر فوجی جوان اپنی جانیں نچھاور کر رہے ہیں۔
اپوزیشن لیڈر نےالزام عائد کیا کہ پیپلز پارٹی نے سندھ میں کرپشن کے ریکارڈ توڑ دیے ہیں، آصف زرداری ہو یا بلاول بھٹو دونوں سندھ کا پانی بیچنے جا رہے ہیں جب کہ آج ہم نے بے نظیر کی تصویر کے پیچھے زرداری کی باقیات دیکھے، آج کی تقریر میں زرداری ثابت نہیں کرسکے کہ پاکستان میں جمہوریت ہے۔
عمرایوب کا کہنا تھا کہ آصف زرداری اپوزیشن کے چیمبر سے گزر کر نہیں گئے، وہ آج بھی متنازع صدر ہیں، ہمارا احتجاج جیسے آج تھا ہمیشہ ایسے جاری رہے گا، ہمیشہ فیصلے ایوان سے باہر ہوتے رہے ہیں، ایوان کو فوقیت نہیں دی گئی۔
اپوزیشن لیڈر نے کہا کہ یہ ایوان مکمل نہیں ہے جس کا ہم اعادہ کرچکے ہیں، ایک سال ہوگیا خیبرپختونخوا صوبہ کی سینیٹ میں نمائندگی ہی نہیں ہے، سینیٹ ہاؤس مکمل نہیں ہے، یہ سب غیر قانونی اقدامات ہورہے ہیں، ایسی صورتحال میں ملک کو شدید خطرات لاحق ہیں۔
