فلسطینی صدر کو ویزا نہ ملا، جنرل اسمبلی سے خطاب ویڈیو لنک پر ہوگا
امریکا کی جانب سے ویزا دینے سے انکار کے بعد اقوام متحدہ نے فلسطینی صدر محمود عباس کو آئندہ ہفتے نیویارک میں ہونے والے اجلاس سے ویڈیو لنک کے ذریعے خطاب کرنے کی اجازت دے دی۔
ذرائع کے مطابق امریکا نے صدر محمود عباس کو یو این جنرل اسمبلی کے اجلاس میں شرکت کے لیے ویزا جاری نہیں کیا۔ یہ پیش رفت اس وقت سامنے آئی جب کئی ممالک نے جنرل اسمبلی میں فلسطین کو بطور ریاست تسلیم کرنے کا اعلان کیا۔
ادھر پرتگال نے بھی فلسطین کو باضابطہ طور پر ریاست تسلیم کرنے کا اعلان کر دیا ہے۔ پرتگالی وزیر خارجہ نے برطانیہ کے حالیہ دورے کے دوران کہا تھا کہ ان کا ملک فلسطین کو تسلیم کرنے پر غور کر رہا ہے، تاہم اب وزارت خارجہ کی جانب سے اس کا اعلان کردیا گیا ہے۔
اقوام متحدہ کے اجلاس سے قبل کینیڈا، فرانس، برطانیہ، بیلجیم اور آسٹریلیا سمیت کئی مغربی ممالک بھی باضابطہ طور پر فلسطین کو ریاست تسلیم کرنے کا ارادہ رکھتے ہیں۔
