پاک بھارت جنگوں پر خرچ اربوں ڈالر عوام کی خوشحالی پر لگنے چاہیے تھے، وزیر اعظم
وزیراعظم شہباز شریف نے کہا ہے کہ پاکستان اور بھارت کے درمیان چار جنگیں ہوئیں جن پر اربوں ڈالر خرچ ہوگئے، یہ وسائل عوام کی ترقی اور خوشحالی پر صرف ہونے چاہییں تھے۔
لندن میں اوورسیز پاکستانیز فاؤنڈیشن کی تقریب سے خطاب کرتے ہوئے وزیراعظم نے کہا کہ پاکستان اور بھارت ہمسایہ ممالک ہیں اور ساتھ رہنے کی ضرورت ہے۔ ان کا کہنا تھا کہ بھارت سے برابری کی بنیاد پر بات چیت چاہتے ہیں لیکن مسئلہ کشمیر کے حل کے بغیر تعلقات آگے نہیں بڑھ سکتے۔ انہوں نے واضح کیا کہ کشمیریوں کی قربانیاں رائیگاں نہیں جانے دی جائیں گی۔
وزیراعظم نے اوورسیز پاکستانیوں کو خراج تحسین پیش کیا اور اپنے خطاب میں اشعار بھی پڑھے۔ برطانیہ میں چار روزہ قیام کے دوران انہوں نے پاکستانی کمیونٹی اور بزنس رہنماؤں سے ملاقاتیں کیں۔
وفاقی وزیر اطلاعات عطا تارڑ کے مطابق وزیراعظم کا خطاب آج دوپہر براہ راست نشر کیا جائے گا۔ انہوں نے بتایا کہ خطاب پرجوش تھا جس میں بڑی تعداد میں افراد شریک ہوئے، اور وزیراعظم نے آپریشن بنیان مرصوص، معیشت اور سفارتی تعلقات پر بھی گفتگو کی۔
واضح رہے کہ وزیراعظم شہباز شریف اقوام متحدہ کی جنرل اسمبلی کے اجلاس میں شرکت کے لیے آج لندن سے امریکا روانہ ہوں گے۔ دورہ امریکا کے دوران وہ مسئلہ کشمیر، فلسطین اور قطر پر حملے کے معاملے پر پاکستان کا مؤقف پیش کریں گے اور جنرل اسمبلی سے خطاب بھی کریں گے۔
