پشاور کاجلسہ تاریخ رقم کرےگا،علی امین گنڈاپورکادعویٰ

وزیراعلیٰ خیبرپختونخواعلی امین گنڈاپور نےدعویٰ کیاہے کہ تحریک انصاف کا 27ستمبر کو پشاور میں جلسہ تاریخ رقم کرے گا۔

وزیراعلیٰ خیبرپختونخوا علی امین گنڈاپور کی زیر صدارت اہم اجلاس منعقد ہوا جس میں ضلع پشاور کی پی ٹی آئی کمیٹی کے عہدیدار شریک ہوئے۔

اجلاس میں 27 ستمبر کے جلسے کے انتظامات اور حکمت عملی پر تفصیلی مشاورت کے بعد تیاریوں کو حتمی شکل دی گئی۔

اجلاس میں فیصلہ کیا گیا کہ جلسہ پشاور کے رنگ روڈ موٹروے چوک کے قریب شام 4 بجے منعقد ہوگا۔ اس موقع پر درود و سلام اور اجتماعی دعا کا خصوصی اہتمام بھی کیا جائے گا۔ وزیراعلیٰ کے ترجمان فراز مغل کو جلسے کے لیے فوکل پرسن مقرر کیا گیا۔

وزیراعلیٰ علی امین گنڈاپور نے اجلاس سے خطاب کرتے ہوئے کہا کہ عمران خان کی رہائی کے لیے پوری قوم متحد ہے اور پشاور کا جلسہ تاریخ رقم کرے گا۔ ان کا کہنا تھا کہ یہ اجتماع حقیقی آزادی کی جدوجہد کا تسلسل اور تحریک انصاف کے لیے ایک تاریخی باب ثابت ہوگا۔

انہوں نے مزید کہا کہ جب قوم یکجہتی کا مظاہرہ کرے تو کوئی طاقت آزادی کی راہ میں رکاوٹ نہیں بن سکتی۔ عمران خان کی قیادت میں یہ تحریک عوام کے مستقبل اور انصاف کے قیام کی جدوجہد ہے اور پشاور کا جلسہ حقیقی آزادی کی تحریک کا سنگ میل ہوگا۔