وزیراعظم کا ایرانی صدر کو فون،حالیہ کشیدگی پرتبادلہ خیال
وزیر اعظم محمد شہباز شریف کا ایرانی صدر سے مسعود پیزیشکیان سے ٹیلی فون پر رابطہ،حالیہ کشیدگی پرتبادلہ خیال کیا۔
شہبازشریف نے ایرانی صدر سے ٹیلفونک رابطے میں تمام فورمز پر ایران کی مکمل حمایت کا اعادہ کیا ہے۔ایرانی صدر نے مستقل حمایت پر پاکستان کا شکریہ ادا کیا۔
وزیراعظم شہباز شریف اور اسلامی جمہوریہ ایران کے صدر ڈاکٹر مسعود پیزشکیان کے مابین مشرق وسطیٰ کی موجودہ کشیدہ صورتحال اور جنگ بندی کے امکانات پر تبادلہ خیال کیا گیا۔
شہباز شریف نے کہا کہ پاکستان مشرق وسطیٰ میں تیزی سے بدلتے حالات پر گہری نظر رکھے ہوئے ہے۔ انہوں نے کہا کہ پاکستان خطے میں امن کے قیام کے لیے مذاکرات اور سفارت کاری کو واحد راستہ سمجھتا ہے۔
وزیراعظم نے اقوام متحدہ کی سلامتی کونسل، او آئی سی سمیت تمام عالمی و علاقائی فورمز پر ایران کی اصولی حمایت کا اعادہ کیا۔ انہوں نے زور دیا کہ تمام فریقین کو بین الاقوامی قوانین اور اقوام متحدہ کے چارٹر کے اصولوں کا احترام کرنا چاہیے۔
ایرانی صدر ڈاکٹر پیزشکیان نے حالیہ کشیدگی کے دوران پاکستان کی مستقل اور اصولی حمایت پر وزیراعظم کا شکریہ ادا کیا۔ انہوں نے خطے میں امن کے فروغ کے لیے پاکستان کے تعمیری کردار کو سراہا۔
دونوں رہنماؤں نے اس بات پر اتفاق کیا کہ امت مسلمہ کو مشکل ترین حالات میں اتحاد، مشاورت اور رابطے کو برقرار رکھنا چاہیے تاکہ مشترکہ چیلنجز کا مؤثر انداز میں مقابلہ کیا جا سکے۔
