وزیراعظم کی گلیشئیرسےبچانےوالےہیروزسےملاقات،25لاکھ انعام سےنوازا
وزیراعظم شہباز شریف سے گلگت بلتستان کے تین قومی ہیروز وصیت خان، انصار اور محمد خان نے ملاقات کی، جنہوں نے گلیشیئر پھٹنے (گلوف) کی بروقت اطلاع دے کر 300 انسانی جانیں بچائیں۔
ملاقات میں وفاقی وزیر اطلاعات و نشریات عطااللہ تارڑ بھی موجود تھے۔ وزیراعظم نے تینوں افراد کی بہادری اور احساس ذمہ داری کو سراہتے ہوئے کہا کہ "میں 24 کروڑ عوام کی جانب سے آپ کا شکریہ ادا کرتا ہوں، آپ کا یہ اقدام ہمیشہ سنہری الفاظ میں یاد رکھا جائے گا۔”
وزیراعظم نے بتایا کہ وزارت موسمیاتی تبدیلی گلگت بلتستان میں پیشگی اطلاع کے نظام کو مزید بہتر بنانے کے لیے تیزی سے کام کر رہی ہے۔
اس موقع پر وزیراعظم نے تینوں ہیروز کو فی کس 25 لاکھ روپے کے چیک اور تعریفی سرٹیفکیٹ دیے۔ تینوں افراد نے پذیرائی پر وزیراعظم کا شکریہ ادا کیا۔
