پی ٹی آئی اسٹیبلشمنٹ تک پہنچنے کے مقصد میں کامیاب ہو گئی،خواجہ آصف

وفاقی وزیر دفاع خواجہ آصف نےکہا ہے کہ تحریک انصاف کا مقصد اسٹیبلشمنٹ تک پہنچنا تھا اوروہ اس میں کامیاب ہوگئے ہیں۔
وزیر دفاع خواجہ آصف نےپارلیمنٹ میں ایرانی مسلح افواج کے وفد سے ملاقات کے بعد میڈیا سے گفتگو کرتے ہوئے کہا کہ اگر بانی پی ٹی آئی کی رہائی کا کوئی مطالبہ بیرون ملک سے آیا تو پاکستان اپنے مفادات کو سامنے رکھ کر فیصلے کرے گا۔
خواجہ آصف نے کہا کہ ہم اندرونی معاملات پر کوئی بیرونی پریشر نہیں لیں گے بالکل ویسے ہی جیسے انہیں اپنے اندرونی معاملات میں مداخلت براشت نہیں ہیں۔انہوں نے کہاکہ نواز شریف اور شہباز شریف اپس میں بھائی ہیں تو بھائیوں میں ملاقات ہوتی رہتی ہے، پی ٹی آئی کے ساتھ جب مذاکرات شروع ہوئے تو اُن کے خلاف مقدمہ چل رہا تھا اور گواہیاں بھی ہوچکی تھیں۔
وزیردفاع نے کہا کہ تحریک انصاف والوں نے خود کہا تھا کہ بانی پی ٹی آئی عمران خان کیخلاف 190ملین پاؤنڈ کیس کا فیصلہ مذاکرات پر اثر انداز نہیں ہوگا، سیاست میں مذاکرات ہوتے رہتے ہیں، پی ٹی آئی نے تصدیق کردی کہ ان کے اسٹیبلشمنٹ کے ساتھ رابطے بحال ہوگئے ہیں۔
خواجہ آصف نے مزید کہا کہ اگر تحریک انصاف والوں کے اسٹیبلشمنٹ سے رابطے بحال ہو گئے ہیں تو پھر ہمارے ساتھ مذاکرات کی کیا ضرورت ہے۔ پی ٹی آئی کا مقصد تھا کہ اسٹیبلشمنٹ تک پہنچے وہ پہنچ گئے ہیں۔
واضح رہے کہ گزشتہ دنوں خیبرپختونخوا میں وزیراعلیٰ خیبرپختونخواعلی امین گنڈاپور اور چیئرمین پی ٹی آئی بیرسٹرگوہر کی آرمی چیف کی ملاقات ہوئی تھی ۔جس پرعرفان صدیقی نے کہا تھا کہ پی ٹی آئی مذاکرات کے نام پر دوکشتیوں میں سوار نہیں ہو سکتی ۔جبکہ بیرسٹرگوہر نے تردید کی تھی کہ آرمی چیف سے ملاقات میں صرف سکیورٹی کے امور پر بات چیت ہوئی تھی۔