شاہ میر بھٹو کو ڈی جی ایس بی سی اے کے عہدے سے ہٹا دیا گیا

ڈائریکٹر جنرل سندھ بلڈنگ کنٹرول اتھارٹی (ایس بی سی اے) شاہ میر بھٹو کو عہدے سے ہٹا دیا گیا۔

حکومت سندھ کی جانب سے جاری کردہ نوٹیفکیشن کے مطابق شاہ میر بھٹو کو ڈی جی ایس بی سی اے کے عہدے سے فارغ کر دیا گیا ہے، اور ان کی جگہ مزمل ہالیپوٹہ کو نیا ڈائریکٹر جنرل تعینات کر دیا گیا ہے۔

مزمل ہالیپوٹہ ایک سینئر سرکاری افسر ہیں جنہیں سندھ میں بلڈنگ ریگولیشن کے معاملات میں تجربہ حاصل ہے۔

یاد رہے کہ رواں برس جولائی میں کراچی کے علاقے لیاری بغدادی میں ایک 5 منزلہ رہائشی عمارت زمین بوس ہو گئی تھی، جس کے نتیجے میں کم از کم 27 افراد جان سے ہاتھ دھو بیٹھے تھے۔

اس اندوہناک واقعے کے بعد، 7 جولائی کو حکومت سندھ نے اس وقت کے ڈی جی محمد اسحاق کھوڑو کو معطل کر کے ان کی جگہ گریڈ 20 کے افسر شاہ میر بھٹو کو تعینات کیا تھا۔

تاہم صرف چند ماہ بعد ہی اب شاہ میر بھٹو کو بھی ان کے عہدے سے ہٹا کر ایس بی سی اے میں نئی قیادت تعینات کر دی گئی ہے۔