سپرنٹنڈنٹ اڈیالہ جیل نے عمران خان کی میڈیکل رپورٹ عدالت میں پیش کردی

سپرنٹنڈنٹ اڈیالہ جیل نے بانی پی ٹی آئی عمران خان کی میڈیکل رپورٹ عدالت میں پیش کر دی ہے۔ انسداد دہشت گردی عدالت راولپنڈی میں بانی پی ٹی آئی کے طبی معائنے کے لیے علیمہ خان کی درخواست پر سماعت ہوئی، جس میں عدالت نے جیل انتظامیہ کی جانب سے پیش کی گئی رپورٹ کا جائزہ لیا۔

سماعت کے دوران، اے ٹی سی کے جج امجد علی شاہ نے سپرنٹنڈنٹ اڈیالہ جیل سے بانی پی ٹی آئی کی میڈیکل رپورٹ طلب کی، جسے جیل انتظامیہ نے عدالت میں پیش کیا۔ رپورٹ میں بانی پی ٹی آئی کی دو سال پر محیط میڈیکل ہسٹری شامل تھی، جس میں ان کی دانتوں، کان، ناک، گلے، آنکھوں اور ہڈیوں سمیت مختلف طبی شکایات کا ذکر کیا گیا ہے۔

لاہور :انسداد دہشت گردی عدالت سے بھارتی دہشت گرد کو 20 سال قید کی سزا

رپورٹ کے مطابق بانی پی ٹی آئی کا علاج ڈاکٹروں کی نگرانی میں جاری ہے، اور ماہرین امراض چشم، آرتھوپیڈک سرجن اور ای این ٹی ماہرین نے متعدد بار ان کا معائنہ کیا اور علاج کیا۔ جیل انتظامیہ نے یہ بھی بتایا کہ بانی پی ٹی آئی کا کولیسٹرول کی سطح بڑھنے کا مسئلہ ہے، جس کا علاج جاری ہے۔

جیل انتظامیہ کی رپورٹ کے مطابق جیل اسپتال کی جانب سے تمام تجویز کردہ علاج اور ادویات بروقت فراہم کی جاتی ہیں، اور 12 اگست کو بانی پی ٹی آئی کا 4 رکنی ڈاکٹروں کی ٹیم نے طبی معائنہ کیا تھا۔

عدالت نے بانی پی ٹی آئی کے طبی معائنے کے لیے علیمہ خان کی درخواست پر سماعت یکم ستمبر تک ملتوی کر دی۔