فضل الرحمان کی درخواست پرمذہبی جماعت اورحکومت میں مذاکرات

جے یو آئی کے سربراہ مولانا فضل الرحمان کی درخواست پرمذہبی جماعت اور حکومت کے مابین مذاکرات شروع ہو گئے۔

جے یو آئی کے سربراہ مولانا فضل الرحمان نے وزیراعلیٰ پنجاب مریم نواز اور رانا ثنا اللہ سے رابطہ کیا ہے اور کہا ہے کہ  احتجاج کرنے والی مذہبی جماعت کا معاملہ خوش اسلوبی کے ساتھ حل کیا جائے۔

ٹی ایل پی کے احتجاج اور پنجاب میں امن و امان کی خراب صورتحال پر سربراہ جے یو آئی مولانا فضل الرحمان متحرک ہوگئے اور انہوں نے وزیراعلی پنجاب مریم نواز سے ٹیلیفونک رابطہ کیا۔

ذرائع کے مطابق مولانا نے وفاقی حکومت کے نمائندے رانا ثناء اللہ سے بھی رابطہ کیا اور دونوں سے علیحدہ علیحدہ درخواست کی کہ وفاق اور پنجاب حکومت مذہبی جماعت  کے احتجاج کے معاملہ کو پرامن طریقے سے سلجھائے، اس معاملے کو خوش اسلوبی اور افہمام و تفہیم کے ساتھ مل بیٹھ کر حل کیا جائے، ملکی حالات تصادم کے متحمل نہیں۔

ذرائع کے مطابق مولانا فضل الرحمان کی درخواست کے بعدمذہبی جماعت اور حکومت کے درمیان مذاکرات شروع ہوگئے ہیں۔

دوسری جانب مذہبی جماعت کا قافلہ مرید کے پہنچ گیا جہاں شرکا آج رات قیام کریں گے۔