ملکی معیشت کی مضبوطی،استحکام اولین ہدف ہے،وزیراعظم
وزیراعظم شہبازشریف کاکہناہےکہ ملکی معیشت کی مضبوطی اور استحکام اولین ہدف ہے۔اب بھی ہمیں طویل سفر طے کرنا ہے۔
دبئی میں پاکستانی کاروباری شخصیات اور سرمایہ کاروں سے خطاب کرتے ہوئے وزیراعظم نے کہا کہ ملک میں مہنگائی کی ماہانہ وار شرح جنوری میں 2.4 فیصد پر آئی ہے جبکہ پالیسی ریٹ اس وقت 2 فیصد پر ہے۔پاکستان کی معیشت پچھلے ایک سال سے آہستہ آہستہ بہترہورہی ہےاور ترسیلات زر جنوری میں 3 ارب ڈالر تک پہنچی جو گزشتہ کئی سالوں میں ایک ریکارڈ ہے۔
وزیراعظم شہباز شریف نے کہا کہ ملک کی آئی ٹی ایکسپورٹس بڑھ رہی ہیں اور اسی طریقے سے برآمدات بھی بڑھ رہی ہیں اوریہ وہ روشن اشارے ہیں جن سے ظاہر ہوتا ہے کہ آئی ایم ایف پروگرام کےبعد ملک میں گزشتہ ایک سال میں معاشی استحکام آیا ہے۔
شہبازشریف کا کہنا تھا کہ پاکستان کو اللہ تعالیٰ نےمعدنیات کےبےشمار ذخائر دیے ہیں جو کھربوں ڈالر کے ہیں لیکن اس پرکوئی خاطرخواہ کام نہیں ہوسکا تاہم معدنیات کے شعبے میں اب کافی پیشرفت ہورہی ہے۔انفارمیشن ٹیکنالوجی میں بھی کافی پوٹینشل ہے اور پاکستان کے نوجوان ہمارابہت بڑا اثاثہ ہیں۔ انہوں نے مزید کہا کہ ہماری 60 فیصد آبادی 15 سے30 سال کےدرمیان ہمارے نوجوان لڑکے اور لڑکیاں ہیں۔
وزیراعظم کاکہنا تھا کہ ان کے لیے اگر ہم ان کی باقاعدہ طریقے سے آئی ٹی اور مصنوعی ذہانت میں ٹریننگ کرائیں اوران کیلئےروزگار کے مواقع پیدا کریں تو ہماری معیشت کا انحصار انفارمیشن ٹیکنالوجی کی طرف ہو سکتا ہے اس لیے پوری طرح کوششیں کی جا رہی ہیں۔
شہبازشریف کا کہنا تھا کہ تیسرا شعبہ زراعت کا ہے جس میں پاکستان نے اللہ تعالیٰ کو بے پناہ وسائل سےمالا مال کیا ہے لیکن بدقسمتی سے ہماری فی ایکڑ پیداوار بہت کم ہے اور ہم نےجدید ٹیکنالوجی کا استعمال نہیں کیا ہے۔
وزیراعظم نے کہا کہ ہماری زرعی پیداوارچاول، گندم، شوگر اور کاٹن بہت اہم ہیں، کئی ممالک ان اجناس کی پیداوار میں بہت آگے نکل چکے ہیں لیکن بدقسمتی سے ہم نے اپنی پیداوار نہیں بڑھائی، اس کی وجہ یہ ہے کہ ہم نے جدید تکنیک متعارف نہیں کروائی۔
وزیراعظم نے کہا کہ ہم نے زراعت کے گریجویٹس کو چین ٹریننگ کے لیے بھیجا ہے اور حکومت پاکستان اس پروگرام کو فنڈ کررہی ہے۔انہوں نے کہا کہ مجھے امید ہے کہ یہ ایک ہزار طلبا چین سے جدید علوم کے ساتھ واپس آئیں گے اور ملکی زرعی پیداوار بڑھانے میں کردار ادا کریں گے۔
