امریکی صدرٹرمپ اور ایرانی قیادت کی اگلے ہفتے ملاقات طے

 امریکی صدر ڈونلڈ ٹرمپ نے کہا ہے کہ ایرانی قیادت سے آئندہ ہفتے ملاقات متوقع ہے، تاہم ان کے بقول اس ملاقات میں کسی معاہدے کی ضرورت باقی نہیں رہی۔

نیٹو سربراہی اجلاس سے خطاب کرتے ہوئے صدر ٹرمپ نے کہا، "ہم شاید کوئی معاہدہ کریں، لیکن میرے لیے یہ ضروری نہیں۔ مجھے کوئی فرق نہیں پڑتا کہ معاہدہ ہوتا ہے یا نہیں۔انہوں نے کہا کہ اہم بات یہ ہے کہ ایران جنگ لڑ چکا ہے، اب جنگ بندی ہو چکی ہے اور وہ بات چیت کے لیے تیار ہیں۔

صدر ٹرمپ نے ایک بار پھر دعویٰ کیا کہ امریکا نے ایران کا جوہری پروگرام تباہ کر دیا ہے۔ ان کے بقول، "ایران کے نیوکلیئر مراکز مکمل طور پر تباہ ہو چکے ہیں، اس لیے مجھے اس معاملے کی زیادہ فکر نہیں۔”

امریکی صدر کے اس بیان پر سیاسی مبصرین کی رائے منقسم ہے۔ بعض تجزیہ کار اس موقف کو طاقت کا اظہار اور مذاکرات سے غیر دلچسپی کی علامت قرار دے رہے ہیں، جبکہ دیگر مبصرین اسے صدر ٹرمپ کی غیر روایتی سفارت کاری کا تسلسل قرار دے رہے ہیں۔