کشمیر ایکشن کمیٹی سے وابستہ باغی رہنما کون؟

اسی طرح راولاکوٹ سے تعلق رکھنے والے عمر نذیر کشمیری عملی زندگی میں کاروبار سے وابستہ رہے۔ طالب علمی کے زمانے میں وہ جموں و کشمیر لبریشن فرنٹ سے متاثر رہے، تاہم بعد ازاں عوامی ایکشن کمیٹی کے بانی ارکان میں شامل ہوگئے۔کمیٹی کے بیشتر اہم اعلانات اور مذاکراتی عمل میں ان کا کردار نمایاں رہا۔ ستمبر 2025 میں حکومت اور ایکشن کمیٹی کے درمیان ہونے والے معاہدے پر دستخط کرنے والوں میں بھی ان کا نام شامل تھا۔ حالیہ کشیدگی کے دوران ان پر حملے اور ان کے ساتھی کی ہلاکت نے احتجاج کو مزید شدت دی۔

ڈڈھیال سے تعلق رکھنے والے خواجہ مہران ارشد پیشے کے اعتبار سے وکیل ہیں۔ جامعہ پنجاب میں طالب علمی کے دوران وہ کشمیری طلبہ سیاست سے وابستہ رہے۔ قانون کی تعلیم مکمل کرنے کے بعد انہوں نے اپنے علاقے میں عوامی مسائل کے حل کے لیے مقامی سطح پر سرگرمیاں شروع کیں۔بعد ازاں وہ عوامی ایکشن کمیٹی کی کور قیادت کا حصہ بن گئے اور مختلف احتجاجی تحریکوں میں فعال کردار ادا کیا۔ کالعدم ایکشن کمیٹی کے ہی ایک اور کور کمیٹی ممبر سردار امان کا تعلق ضلع سدھنوتی سے ہے۔ کراچی یونیورسٹی میں تعلیم کے دوران وہ طلبہ سیاست میں متحرک رہے۔ تعلیم مکمل کرنے کے بعد اپنے آبائی علاقے واپس آکر کاروبار شروع کیا، تاہم عوامی ایکشن کمیٹی کی سرگرمیوں سے ان کی وابستگی بڑھتی گئی۔اگرچہ وہ مرکزی قیادت کا حصہ نہیں سمجھے جاتے، لیکن ضلعی سطح پر ان کا کردار خاصا مؤثر رہا ہے اور ان کے خلاف مختلف مقدمات بھی درج کیے جا چکے ہیں۔

کشمیر میں جاری کشیدہ صورتحال بارے حکومت کا مؤقف ہے کہ عوامی ایکشن کمیٹی کے بعض رہنما ریاستی اداروں کے خلاف اشتعال انگیزی، امنِ عامہ میں خلل اور دیگر سنگین الزامات میں ملوث ہیں، اسی بنیاد پر تنظیم کو کالعدم قرار دیا گیا ہے۔دوسری جانب ایکشن کمیٹی اور اس کے حامی ان الزامات کو سیاسی انتقام قرار دیتے ہیں۔ ان کا کہنا ہے کہ ان کی جدوجہد عوامی حقوق، مہنگائی کے خاتمے، مقامی اختیارات اور آئینی مطالبات کے لیے ہے، اور اختلافِ رائے کو دبانے کے لیے قانونی کارروائیاں کی جا رہی ہیں۔

مبصرین کے مطابق عوامی ایکشن کمیٹی کے ان رہنماؤں کی کہانی دراصل پاکستان کے زیرِ انتظام کشمیر کے بدلتے ہوئے سیاسی منظرنامے کی عکاس ہے۔ ان میں سے کئی افراد نے اپنی سیاسی شناخت طلبہ تنظیموں، مقامی کاروباری حلقوں یا سماجی سرگرمیوں سے حاصل کی، مگر وقت کے ساتھ وہ ایک ایسی تحریک کا حصہ بن گئے جو اب ریاست اور احتجاجی قیادت کے درمیان شدید محاذ آرائی کی صورت اختیار کر چکی ہے۔یہی وجہ ہے کہ "طلبہ رہنما سے انتہائی مطلوب تک” کا سفر محض چند شخصیات کی داستان نہیں، بلکہ ایک ایسے خطے کی سیاسی کشمکش کی علامت ہے جہاں عوامی مطالبات، ریاستی اختیارات اور احتجاجی سیاست ایک پیچیدہ موڑ پر آ کھڑے ہوئے ہیں۔