طوفانی بارشوں نے گوادر میں تباہی مچا دی، معمولات زندگی متاثر

شدید طوفانی ہوائوں نے گوادر میں تباہی مچا دی، مسلسل 16 گھنٹے بارش سے نشیبی علاقے زیر آب آگئے ہیں اور  بجلی کا نظام بھی متاثر ہوا ہے۔گوادر میں بارش وقفے وقفے سے جاری ہے، سڑکیں  زیر آب آگئیں اور  پانی گھروں اور دکانوں میں داخل ہوگیا ہے، جس کے باعث شہریوں کو مشکلات کا سامنا ہے،کئی مکانات گر گئے، شہری نقل مکانی پر مجبور ہیں۔نکاس کا مؤثر نظام نہ ہونے سے پانی سڑکوں پر جمع ہوگیا ہے،گوادر کے علاقوں ٹو باغ ، شیخ عمر، سہرابی وارڈ، ملابند تھانہ وارڈ، شمبے سمائیل میں بارش کا پانی گھروں میں داخل ہوگیا ہے۔جنت بازار  اور بلال مسجد ائیرپورٹ روڈ پر بارش کا پانی دکانوں میں داخل ہوگیا ہے۔چیئرمین یوسی سربندن کے مطابق تیز ہواؤں کے باعث کئی کشتیاں آپس میں ٹکرا کر ٹوٹ گئی ہیں۔