190 ملین پاؤنڈ کیس : عمران خان اور بشریٰ بی بی کی سزا معطلی کی درخواستوں پر سماعت نہیں ہوسکی
190 ملین پاؤنڈ کیس میں اسلام آباد ہائی کورٹ کے جج کے رخصت پر ہونے کے باعث عمران خان اور بشریٰ بی بی کی سزا معطلی کی درخواستوں پر سماعت آج نہیں ہوسکی۔
اسلام آباد ہائی کورٹ کے قائم مقام چیف جسٹس سرفراز ڈوگر اور جسٹس محمد آصف نے سزا معطلی درخواستوں پر سماعت کرنا تھی،تاہم جسٹس محمد آصف کے رخصت پر ہونے کےباعث سماعت نہیں ہوئی۔
چیف جسٹس سرفراز ڈوگر کی سربراہی میں ڈویژن بینچ آج دستیاب نہیں ہوگا، قائم مقام چیف جسٹس بھی صرف سنگل بنچ میں کیسز کی سماعت کریں گے۔
واضح رہےکہ اسلام آباد ہائی کورٹ کے رجسٹرار آفس نے گزشتہ روز کازلسٹ جاری کی تھی جس کےمطابق چیف جسٹس سرفراز ڈوگر اور جسٹس محمد آصف کو آج عمران خان اور بشریٰ بی بی کی ضمانت کی درخواستوں پر سماعت کرنا تھی۔
عدالت نے نیب کی استدعا پر اسپیشل پبلک پراسیکیوٹر کی تعیناتی کے لیے آج تک کی مہلت دی تھی، 5 جون کی سماعت نیب کی استدعا پر بغیر کارروائی آگے بڑھے ملتوی ہو گئی تھی، 15 مئی کی سماعت میں نیب کو جواب جمع کرانے کے لیے نوٹس جاری ہوا تھا۔
بجٹ میں جتنا ریلیف دے سکتے تھے دیا ہے : وزیر خزانہ
عمران خان اور بشریٰ بی بی نے سزا معطل کرکے ضمانت پر رہائی کی استدعا کر رکھی ہے، 17 جنوری کو احتساب عدالت نے عمران خان کو 14 سال اور بشریٰ بی بی کو 7 سال قید کی سزا سنائی تھی۔
