پی ٹی آئی رہنماؤں شعیب شاہین اور اسد قیصر کی مختلف مقدمات میں ضمانت قبل از گرفتاری منظور

اسلام آباد کی انسداد دہشت گردی عدالت کے جج طاہر عباس سپرا نے تحریک انصاف کے شعیب شاہین اور علی بخاری کے خلاف تھانہ کوہسار میں درج مقدمے میں ضمانت قبل از گرفتاری کی درخواستوں پر سماعت کی، عدالت نے شعیب شاہین اور علی بخاری ایڈوکیٹ کی مقدمہ میں ضمانت منظور کرلی۔

شعیب شاہین کے وکیل نے عدالت میں دلائل دیتے ہوئے کہا کہ میڈیا موجود تھا، سب کچھ سامنے تھا، مقدمے میں بے بنیاد الزامات لگائے گئے ہیں۔ جب بھی پر امن احتجاج کرتے ہیں مقدمہ درج ہو جاتا ہے۔ علی بخاری کے وکیل نے کہا کہ الیکشن ٹریبونل کی کارروائی کی وجہ سے انتقام کا نشانہ بنایا جا رہا ہے۔

شاہ محمود قریشی ریلی نکالنے پر درج مقدمے میں بری

عدالت نے بعد ازاں دلائل سننے کے بعد تحریک انصاف کے وکلاء شعیب شاہین اور علی بخاری کی تھانہ کوہسار میں درج مقدمے میں ضمانت قبل از گرفتاری منظور کرلی اور ایک ایک لاکھ روپے کے مچلکے جمع کروانے کا حکم دیا۔

دوسری جانب اسلام آباد کی ڈسٹرکٹ اینڈ سیشن کورٹ میں رہنما پی ٹی آئی اسد قیصر کی آزادی مارچ کے 4 مقدمات میں ضمانت قبل از گرفتاری کی درخواستوں پر سماعت سیشن جج اعظم خان نے کی جس میں اسد قیصر وکیل عائشہ خالد ایڈووکیٹ اور قمر عنایت کے ساتھ عدالت میں پیش ہوئے ۔ بعد ازاں عدالت نے دلائل سننے کے بعد درخواست ضمانت قبل از گرفتاری منظور کرلی۔