سپریم کورٹ کے ایڈیشنل رجسٹرار جوڈیشل عہدے سے فارغ

سپریم کورٹ نے کیس مقرر کرنے میں غلطی پرایڈیشنل رجسٹرار جوڈیشل نذرعباس کوعہدےسےہٹادیا۔
سپریم کورٹ کی جانب سے ایڈیشنل رجسٹرار جوڈیشل کوعہدے سےہٹانے کا اعلامیہ جاری کر دیا گیا۔
اعلامیے میں کہا گیا ہے کہ ایڈیشنل رجسٹرار جوڈیشل نذر عباس سنگین غلطی کے مرتکب ہوئے،رجسٹرار سپریم کورٹ کو معاملے کودیکھنے کی ہدایت کی گئی ہے۔
ایڈیشنل رجسٹرار وڈیشل نے آئینی بینچ کا مقدمہ غلطی سے ریگولر بینچ کے سامنے سماعت کیلئےمقرر کیا، نتیجتاً سپریم کورٹ اورفریقین کے وقت اور وسائل کا ضیاع ہوا۔
واضح رہے کہ سپریم کورٹ کے سینئر جج جسٹس منصور علی شاہ، جسٹس عائشہ ملک اور جسٹس عقیل عباسی نےبینچز اختیارات کا کیس مقرر نہ ہونے کے معاملے پربھی چیف جسٹس یحییٰ آفریدی اور آئینی بینچ کے سربراہ جسٹس امین الدین کو خط لکھا تھا۔
خط میں مزید لکھا تھا کہ کمیٹی،جوڈیشل آرڈرکیخلاف نہیں جاسکتی تھی اور کیس20 جنوری کومقررکرنے کی پابند تھی،ہمیں کمیٹی کےفیصلےکا معلوم نہیں، پورے ہفتے کی کاز لسٹ بھی تبدیل کردی گئی اورآرڈرجاری کیےبغیر کیسز کو بینچ کے سامنے سے ہٹا دیا گیا۔
خط میں کہا گیا تھا کہ عدالتی حکم کی تعمیل نہ کرنےپرآفس کی ناکامی اورادارے کی سالمیت مجروح ہوئی، عدالت کےطے شدہ قانون کی خلاف ورزی کی گئی، بینچ کے نوٹس لینے کےدائرہ اختیار کو نہیں چھیناجاسکتا،بینچز کی آزادی کےبارے میں بھی سنگین خدشات پیدا ہوتے ہیں۔