کیا حریت پسندی کا نقاب اوڑھے بلوچ دراصل دہشت گرد ہیں؟

معروف لکھاری اور کالم نگار یاسر پیرزادہ نے کہا ہے کہ بلوچستان میں قوم پرستوں کا نقاب اوڑھ کر معصوم پاکستانیوں کا قتل عام کرنے والے علیحدگی پسند دراصل دہشت گرد ہیں جو خود کو حریت پسند قرار دے کر عوام کو دھوکہ دینے کی کوشش کر رہے ہیں۔

روزنامہ جنگ کے لیے اپنی تازہ تحریر میں یاسر پیرزادہ کہتے ہیں کہ بلوچستان کا معاملہ اب ’’اگر مگر، چونکہ چنانچہ‘‘ سے آگے نکل چکا ہے۔ کس نے ہتھیار اٹھائے، کیوں اٹھائے، پنجاب استحصال کرتا ہے یا نہیں، بلوچ سردار کس مرض کی دوا تھے، بلوچستان کا ترقیاتی بجٹ کتنا ہے، لاپتا افراد کے مسئلے کا کیا حل ہے، بی ایل اے کا بیانیہ درست ہے یا غلط، گوادر پر کس کا حق ہے، علیحدگی پسند لیڈروں کو قومی دھارے میں شامل کیوں نہیں کیا جاتا، بلوچستان کے معدنی وسائل پر کون قابض ہے وغیرہ۔ اِن سوالات پر بحث پہلے بھی ہوتی رہی ہے، آئندہ بھی ہوتی رہے گی، لیکن ایسی کسی بحث کی آڑ میں دہشت گردوں کو اب مزید رعایت نہیں دی جا سکتی۔ دنیا میں کسی بھی دہشت گرد کو ایک لمحے کی رعایت نہیں ملتی مگر مجھے یہ لکھنا اِس لیے پڑا کہ بلوچستان کی محرومیوں کے حوالے سے بہرحال ایک بیانیہ تو موجود تھا، کوئی بھی باضمیر دانشور یا لکھاری یہ نہیں کہتا تھا کہ بلوچستان میں احساس محرومی نہیں یا وہاں لاپتا افراد کا مسئلہ نہیں۔ لیکن اب اگر کسی کا خیال ہے کہ یہ مسئلہ علیحدگی پسندوں سے مذاکرات کے ذریعے حل کیا جا سکتا ہے تو اُس کا وقت گزر چکا۔

یاسر پیرزادہ کا کہنا ہے کہ دنیا میں ایسی کسی مسلح جدوجہد کی کوئی حمایت باقی نہیں رہی جس میں چار سو مسافروں کی ٹرین کو ہائی جیک کرنے اور پھر قتل عام کرنے والوں کو حریت پسند سمجھا جائے اور نہتے، غریب اور بے بس لوگوں کے شناختی کارڈ دیکھ کر انہیں گولیاں مارنے والوں کو نیلسن منڈیلا کہا جائے۔ دس سال پہلے جب اِس ملک میں اسی طرح دہشت گردی کا دور دورہ تھا تو کسی کے وہم و گمان میں بھی نہیں تھا کہ ہم اِس عفریت کو اتنی جلدی شکست دے پائیں گے، سچ کہوں تو خود مجھے بھی یقین نہیں تھا، لیکن جس طرح پاکستان نے دہشت گردی کی وہ جنگ جیتی، وہ ایک کیس سٹڈی کے طور پر پڑھائی جانی چاہیے۔

یاسر پیرزادہ کہتے ہیں کہ اصل میں ہمارا ایک مسئلہ یہ بھی ہو چکا ہے کہ اپنی جائز تعریف کرتے ہوئے بھی جھجکتے ہیں کہ کہیں ہم پر کوئی ’لیبل‘ نہ لگ جائے، شاید اِس کی وجہ یہ بھی ہے کہ آج کل خود مَلامتی بہت بِکتی ہے۔ دنیا بھر میں علیحدگی پسند مسلح تنظیموں کا وجود کوئی نئی بات نہیں۔ دور کیوں جائیں، بغل میں سری لنکا ہے، وہاں تامل ٹائیگرز نے کئی سال تک علیحدگی کی تحریک چلائی جس کا مقصد سری لنکا کے شمالی اور مشرقی حصوں میں تامل ایلام کے نام سے ایک آزاد ریاست کا قیام تھا۔ تامل باغیوں نے سری لنکا کے شہر جافنا پر قبضہ کر رکھا تھا اور اسے عملاً اپنا دارالحکومت بنایا ہوا تھا، یعنی سری لنکن حکومت کی رِٹ وہاں نہیں تھی۔ تامل ٹائیگرز نے کئی دہائیوں تک مسلح جدوجہد کی اور خودکش حملوں سمیت تمام پرُتشدد طریقے اختیار کیے جنہیں عالمی سطح پر امریکہ، برطانیہ، یورپی یونین سمیت متعدد ممالک نے دہشت گردی قرار دیا۔ بالآخر 2009 میں تامل باغیوں کو سری لنکن فوج کے ہاتھوں مکمل طور پر شکست سے دوچار ہونا پڑا اور اِس طرح اُن کی جدوجہد ناکامی پر مُنتج ہوئی۔ اگر سری لنکا یہ کر سکتا ہے تو ہم کیوں نہیں؟

یاسر پیرزارا کہتے ہیں کہ اب کچھ بات بلوچ قوم پرست بیانیے کی بھی ہو جائے۔ اِس میں کوئی شک نہیں کہ بلوچستان میں انتہا کی غربت ہے، صوبے کے معدنی وسائل کے ثمرات عوام تک نہیں پہنچے، سوئی سے گیس نکال کر پنجاب کے آخری ضلع تک کو دے دی گئی مگر بلوچوں کے گھروں کے چولہے ٹھنڈے رہے اور اِس قسم کی بہت سی باتیں جن میں بہرحال سچائی ضرور ہے۔اگر کسی نے اِس بلوچ بیانیے کا خلاصہ جاننا ہو تو ایک قوم پرست لیڈر کا خط ٹویٹر پر دیکھ لے جو انہوں نے جعفر ایکسپریس کے ہائی جیک ہونے کے بعد پوسٹ کیا۔ لیکن یہ تصویر کا ایک رُخ ہے، دوسرا رُخ یہ ہے کہ بلوچستان کی آبادی کو اگر صوبے کے کُل بجٹ پر تقسیم کیا جائے تو جواب بارہ ہزار روپے آئے گا جبکہ یہی فارمولا اگر پنجاب پر لگایا جائے تو جواب پانچ ہزار تین سو روپے آئے گا، یعنی بلوچستان میں ایک شخص کیلئے جتنا بجٹ ہے پنجاب میں اُس کا نصف بھی نہیں ہے۔

اب جغرافیے کے دعوے کی بھی کچھ پڑتال ہو جائے۔ جن قوم پرست لیڈر نے بیانیے کا خط پوسٹ کیا ہے انہوں نے ایک اور پوسٹ میں گوادر کی تاریخ بیان کرتے ہوئے لکھا ہے کہ پہلے دن سے گوادر بلوچستان کا حصہ تھا لہٰذا کسی کو یہ مغالطہ نہیں ہونا چاہیے کہ پاکستان نے عمان سے گوادر خرید لیا تو وہ بلوچستان سے علیحدہ کوئی حصہ ہے۔ آنجناب 1783سے شروع ہوئے اور انہوں نے بتایا کہ کس طرح تخت کی لڑائی کی وجہ سے وقتی طور پر گوادر عمان کے ایک حکمران کے پاس چلا گیا تھا اور انگریزوں نے بھی اس صورتحال کو نہیں چھیڑا، بعد ازاں پاکستان نے محض اسے واپس لے لیا اور کچھ نہیں۔ وہ محترم یہاں بھی تاریخ مسخ کر گئے۔ پہلا سوال تو یہ ہے کہ بات 1783سے ہی کیوں شروع کی جائے، ساڑھے تیرہ ارب سال پہلے سے کیوں نہ شروع کر لیں جب بگ بینگ سے کائنات وجود میں آئی تھی! اور اگر 1783 سے ہی شروع کرنی ہے تو ڈیڑھ سو سال تک تو گوادر عمان کے پاس ہی رہا، اُس عرصے میں تو کسی بلوچ سرمچار نے بندوق کے زور پر اُس مادرِ وطن کو حاصل کرنے کی کوشش نہیں کی، اور جب پاکستان بن گیا تو اُس کے بعد بھی کسی سردار کو خیال نہیں آیا کہ عمان سے معاملات طے کرکے اپنی زمین واپس لے لی جائے، یہ کام وزیر اعظم فیروز خان نون نے کیا۔

یاسر پیرزادہ کے بقول مدعا فقط اتنا ہے کہ بلوچستان کے احساس محرومی میں ہر پاکستانی بلوچ قوم کے ساتھ ہے مگر اِس کا یہ مطلب نہیں کہ حقائق مسخ کیے جائیں اور بلوچستان کے جغرافیے سے متعلق وہ سوال کیے جائیں جو بھارت بھی نہیں کرتا۔ بلوچستان میں دہشت گرد یہی بیانیہ پروان چڑھا رہے ہیں جس کی کوئی تاریخی سند نہیں۔ اور اِس تمام بحث سے قطع نظر، جس قسم کی بہیمانہ کارروائیاں یہ دہشت گرد بلوچستان میں کر رہے ہیں، اُس کے بعد مظلومیت کا وہ بیانیہ بھی ختم ہو جائے گا جسکی وجہ سے انہیں میڈیا میں ہمدردی ملتی تھی۔ بلوچستان پر علمی بحث ہوتی رہے گی، فی الحال ہم نے بلوچستان کے ایک ایک اِنچ پر ریاستی رِٹ قائم کرنی ہے، اور اِس کاطریقہ یہ ہے کہ اُسی طرح دہشت گردی کی یہ جنگ لڑی جائے جس طرح ہم نے ماضی میں لڑی تھی۔ بلوچستان میں دہشت گرد ہیں جنہوں نے حریت پسندوں کا نقاب اوڑھ رکھا ہے، اِنہیں بے نقاب کریں۔