بلوچستان حکومت کا بڑا فیصلہ، ’بینک آف بلوچستان‘ کے قیام کی منظوری
حکومت بلوچستان نے صوبے کی معاشی ترقی، عوام اور تاجروں کو سہولت فراہم کرنے کے لیے ’’بینک آف بلوچستان‘‘ کے قیام کا اعلان کر دیا۔
سرکاری ٹی وی کی رپورٹ کے مطابق وزیر اعلیٰ بلوچستان میر سرفراز بگٹی کی زیر صدارت ایک اہم اجلاس ہوا، جس میں بینک کے قیام کی ابتدائی فزیبلٹی رپورٹ پیش کی گئی۔ رپورٹ کو قابلِ عمل قرار دیتے ہوئے وزیر اعلیٰ نے ایک ہفتے کے اندر آپریشنل پلان تیار کرنے کی ہدایت جاری کی۔
وزیر اعلیٰ نے کہا کہ بینک آف بلوچستان کے قیام سے عوام، تاجروں اور سرمایہ کاروں کو معیاری اور آسان بینکنگ سہولیات میسر آئیں گی، جبکہ صوبے کی معیشت کو نئی سمت ملے گی۔ ان کے مطابق یہ منصوبہ بلوچستان کی معاشی سرگرمیوں کو فروغ دینے اور ترقی کی رفتار تیز کرنے میں مددگار ثابت ہوگا۔
انہوں نے مزید کہا کہ اس اقدام سے صوبے کے نوجوانوں کے لیے روزگار کے نئے مواقع پیدا ہوں گے اور یہ بینک بلوچستان کی معیشت میں ایک تاریخی سنگِ میل کی حیثیت رکھے گا۔
اجلاس میں آن لائن شریک بینکنگ ماہرین نے بھی منصوبے کی جلد تکمیل اور فعال بنانے پر اتفاق کیا۔
