گلگت بلتستان کے سیلاب متاثرین کیلئے3 ارب کاریلیف پیکیج منظور
اقتصادی رابطہ کمیٹی نے گلگت بلتستان کے سیلاب متاثرین کے لیے 3 ارب کاریلیف پیکیج، پی ٹی وی کے لیے 11 ارب گرانٹ کی منظوری دیدی۔
اسلام آباد میں وفاقی وزیر خزانہ محمد اورنگزیب کی زیر صدارت اقتصادی رابطہ کمیٹی (ای سی سی) کا اجلاس ہوا، جس میں گلگت بلتستان کے سیلاب متاثرین کے لیے 3 ارب روپے کے ریلیف پیکیج کی منظوری دے دی گئی۔
اجلاس میں فیصلہ کیا گیا کہ متاثرہ خاندانوں کو خیمے، خوراک، ادویات اور دیگر بنیادی سہولیات فراہم کی جائیں گی تاکہ انہیں فوری ریلیف مل سکے۔
اسی اجلاس میں پاکستان ٹیلی ویژن کارپوریشن (پی ٹی وی) کے لیے 11 ارب روپے کی ضمنی تکنیکی گرانٹ کی بھی منظوری دی گئی۔ ای سی سی نے ابتدائی طور پر 3 ارب 81 کروڑ 30 لاکھ روپے جاری کرنے کی اجازت دی جبکہ بقیہ رقم مرحلہ وار تنخواہوں، پینشن اور آپریشنل اخراجات کے لیے جاری کی جائے گی۔
اجلاس میں وفاقی وزرا اویس لغاری، علی پرویز ملک اور رانا تنویر نے بھی شرکت کی۔
