بی ایل اے اور مجید بریگیڈ عالمی دہشتگرد تنظیمیں قرار

امریکا نے کالعدم بلوچستان لبریشن آرمی اور اس کی ذیلی تنظیم مجید بریگیڈ کو باضابطہ طور پر عالمی دہشت گرد تنظیمیں قرار دے دیا۔

امریکی محکمہ خارجہ کے مطابق بی ایل اے اور اس کے عرفی نام مجید بریگیڈ کو ’فارن ٹیررسٹ آرگنائزیشن‘ (ایف ٹی او) کی فہرست میں شامل کر لیا گیا ہے، جبکہ مجید بریگیڈ کو بی ایل اے کا ’الیاس‘ تسلیم کرتے ہوئے اسے 2019 میں دی گئی ’اسپیشلی ڈیزگنیٹڈ گلوبل ٹیررسٹ‘ (ایس ڈی جی ٹی) فہرست میں بھی برقرار رکھا گیا ہے۔

بی ایل اے کو 2019 میں متعدد دہشت گرد حملوں کے بعد ایس ڈی جی ٹی فہرست میں شامل کیا گیا تھا۔ اس کے بعد بھی تنظیم نے کئی حملوں کی ذمہ داری قبول کی، جن میں مجید بریگیڈ کی جانب سے کیے گئے خودکش حملے شامل ہیں۔

امریکی محکمہ خارجہ کے مطابق 2024 میں بی ایل اے نے کراچی ایئرپورٹ کے قریب اور گوادر پورٹ اتھارٹی کمپلیکس پر خودکش حملے کیے، جب کہ مارچ 2025 میں اس نے کوئٹہ سے پشاور جانے والی جعفر ایکسپریس کو ہائی جیک کرنے، 31 شہریوں و سیکیورٹی اہلکاروں کو قتل کرنے اور 300 سے زائد مسافروں کو یرغمال بنانے کا اعتراف کیا۔

محکمہ خارجہ نے بیان میں کہا کہ یہ فیصلہ دہشت گردی کے خاتمے کے لیے امریکی عزم کا مظہر ہے۔ ان کے مطابق دہشت گرد تنظیموں کی نامزدگی انسدادِ دہشت گردی کی حکمت عملی کا اہم حصہ ہے، جس سے دہشت گرد سرگرمیوں کے لیے مالی اور دیگر وسائل کی فراہمی روکی جا سکتی ہے۔