قانون ہاتھ میں لینےوالوں پرسنگین دفعات کے تحت مقدمات درج کیے جائیں گے ، آئی جی اسلام آباد

اسلام آباد: آئی جی اسلام آباد علی ناصر رضوی کا کہناہےکہ وفاقی دارالحکومت کی سکیورٹی پر کوئی سمجھوتہ نہیں کیا جائے گا اور قانون ہاتھ میں لینےوالوں پرسنگین دفعات کے تحت مقدمات درج ہوں گے۔

آئی جی اسلام آبادعلی ناصر رضوی نے ڈی چوک اسلام آباد کا دورہ کیا اور پی ٹی آئی احتجاج کے پیش نظرکیے جانے والے سکیورٹی انتظامات کاجائزہ لیا۔

آئی جی اسلام آباد علی ناصر رضوی نےکہا کہ شہر میں دفعہ 144 نافذ ہے،کسی بھی شر انگیزی سےنمٹنے کے لیے تیار ہیں، اسلام آبادمیں کسی قسم کے احتجاج،ریلی یا مجمعے پر پابندی ہے اور قانون کی خلاف ورزی کرنے والوں کے خلاف سخت کارروائی ہوگی۔

تحریک انصاف کے تین اراکین قومی اسمبلی گرفتار

علی ناصررضوی نےکہاکہ سکیورٹی پلان کا مقصد شر انگیزی کو روکنا ہے، قانون ہاتھ میں لینےوالوں پر سنگین دفعات کے تحت مقدمات درج ہوں گے،اسلام آباد کی سکیورٹی پر کوئی سمجھوتہ نہیں کیا جائےگا۔

انہوں نےمزید کہاکہ شہرمیں سکیورٹی انتظامت عوام کی جان و مال کی حفاظت کےپیش نظر کیے ہیں، رکاوٹیں ضرور ہیں لیکن آمدورفت کےسلسلے کو بند نہیں کیا اور لوگوں کی آمدورفت کو یقینی بنایاجا رہا ہے۔

آئی جی اسلام آباد نے درخواست کی کہ شہری کسی قسم کی ہنگامہ آرائی یا غیرقانونی عمل کاحصہ نہ بنیں، کسی بھی غیر قانونی سرگرمی کےخلاف قانون حرکت میں آئےگا۔