چیئرمین نیب 15 ستمبر کو ذاتی حیثیت میں عدالت طلب

لاہور ہائیکورٹ نے چیئرمین قومی احتساب بیورو (نیب) لیفٹیننٹ جنرل (ر) نذیر احمد بٹ کو 15 ستمبر کو ذاتی حیثیت میں طلب کر لیا ہے اور انہیں مکمل ریکارڈ کے ساتھ پیش ہونے کا حکم دیا ہے۔

چیف جسٹس عالیہ نیلم کی سربراہی میں دو رکنی بینچ نے توہین عدالت کی درخواست پر سماعت کی۔ سماعت کے دوران درخواست گزار احسن عابد ایڈووکیٹ نے مؤقف اختیار کیا کہ خسرو بختیار اور ہاشم جواں بخت نے ناجائز اثاثے بنائے، اس حوالے سے نیب کو انکوائری کی درخواست دی گئی لیکن عدالتی حکم کے باوجود کارروائی نہیں کی گئی۔

درخواست گزار نے عدالت سے استدعا کی کہ حکم عدولی پر چیئرمین نیب کے خلاف توہین عدالت کی کارروائی عمل میں لائی جائے۔

اسلام آباد: تھانہ آئی نائن کی حدود سے باپ، بیٹا اور بیٹی کی لاشیں برآمد

سماعت کے دوران چیف جسٹس نے استفسار کیا کہ نیب کی جانب سے کون عدالت میں موجود ہے، جس پر سرکاری وکیل نے بتایا کہ نیب کی طرف سے کوئی نمائندہ پیش نہیں ہوا۔

بعد ازاں عدالت نے چیئرمین نیب کو ریکارڈ سمیت 15 ستمبر کو طلب کر کے مزید سماعت اس تاریخ تک ملتوی کر دی۔