متنازع ٹوئٹ کیس: ایمان مزاری اور ہادی علی پر فردِ جرم عائد

اسلام آباد کی ڈسٹرکٹ اینڈ سیشن کورٹ نے متنازع ٹوئٹ کیس میں ایمان مزاری اور ان کے شوہر ہادی علی چٹھہ پر فردِ جرم عائد کردی۔

 اسلام آباد کے ایڈیشنل سیشن جج افضل مجوکہ نے ایمان مزاری اور ہادی علی چٹھہ کے خلاف کیس کی سماعت کی۔ دورانِ سماعت عدالت نے دونوں ملزمان پر فردِ جرم عائد کی، تاہم ایمان مزاری اور ہادی علی نے صحتِ جرم سے انکار کردیا۔

عدالت نے صحتِ جرم سے انکار کے بعد استغاثہ کے تمام گواہان کو آئندہ سماعت پر طلب کرلیا۔

سماعت کے اختتام پر عدالت نے ہادی علی چٹھہ کو دوبارہ ضمانتی مچلکے جمع کروانے کا حکم دیا اور کیس کی مزید کارروائی 5 نومبر تک ملتوی کردی۔

واضح رہے کہ ایمان مزاری اور ہادی علی چٹھہ کے خلاف مقدمہ نیشنل سائبر کرائم انویسٹی گیشن ایجنسی (NCCIA) کی جانب سے درج کیا گیا تھا۔