تعلیم جاری رکھنےوالے قومی کرکٹرزکی سکالرشپ کیلئےمعاہدہ طے
پاکستان کرکٹ بورڈکابڑااقدام، کرکٹ کے ساتھ تعلیم بھی جاری رکھنے والے نوجوان کرکٹرز کواسکالرشپ دینےکیلئےادارےکےساتھ معاہدہ کرلیا۔
لاہور میں پی سی بی ہیڈ کوارٹر میں معاہدے پر دستخط کی تقریب ہوئی جس کے مہمانِ خصوصی چیئرمین پی سی بی محسن نقوی تھے۔
پاکستان وائٹ بال ٹیم کے ہیڈ کوچ مائیک ہیسن، ڈائریکٹر ڈومیسٹک کرکٹ عبداللّٰہ خرم نیازی اور جی ایم ڈومیسٹک جنید ضیاء بھی موجود تھے۔
پی سی بی کے چیف آپریٹنگ آفیسر سمیر احمد اور تعلیمی ادارے کے چیف ایگزیکٹو قاسم قصوری نے معاہدے پر دستخط کیے۔
معاہدے کے تحت ملک کے 16 ریجنز سے تعلق رکھنے والے انڈر 15، انڈر 17 اور انڈر 19 کیٹیگریز کے 120 نمایاں کھلاڑیوں کو مفت تعلیم دی جائے گی۔
نوجوان کرکٹرز کے لیے تعلیمی وظائف کا معاہدہ 3 برس تک نافذ العمل رہے گا۔
محسن نقوی نے نوجوان کھلاڑیوں کے لیے تعلیمی معاونت پر تعلیمی ادارے کے اقدام کو سراہا اور کہا کہ نوجوان کرکٹرز کھیل کے ساتھ تعلیم پر بھی پوری توجہ دے سکیں گے۔
محسن نقوی نے کہا کہ نوجوان کرکٹرز کے تعلیمی وظائف کا معاہدہ دور رس نتائج کا حامل ہوگا، شراکت داری سے مستقبل کے کرکٹ اسٹارز کی تعلیمی ضروریات کو پورا کیا جاسکے گا۔
انہوں نے کہا کہ تعلیمی اسکالرشپ کے دائرہ کار کو مزید وسعت دی جائے گی تاکہ زیادہ سے زیادہ کرکٹ اسٹارز اس سے فائدہ اٹھا سکیں۔
