فیاض الحسن چوہان نےعمران خان پر”لوٹا“چوری کاالزام لگادیا

سابق صوبائی وزیر فیاض الحسن چوہان نے بانی تحریک انصاف عمران خان پر سونےکالوٹا اور ڈنرسیٹ چوری کرنےکا الزام لگادیا۔

پاکستان تحریک انصاف کے سابق رہنما اور عمران خان کے سابق میڈیا ایڈوائزر فیاض الحسن چوہان نے دعویٰ کیا ہے کہ کرتار پور راہداری کے افتتاح پر سابق وزیراعظم کو ملنے والا سونے کا لوٹا پیتل کے لوٹے سے بدل کر توشہ خانہ میں جمع کروایا گیا۔

ایک انٹرویو میں فیاض الحسن چوہان نے کہا کہ جنوری یا فروری 2019 میں کرتار پور راہداری کے افتتاح کے موقع پر، جہاں سابق آرمی چیف جنرل (ر) قمر جاوید باجوہ اور اس وقت کے وزیراعظم عمران خان موجود تھے، سکھ برادری نے بطور تحفہ سونے کا لوٹا پیش کیا۔

انہوں نے الزام لگایا کہ عمران خان اور ان کی اہلیہ نے اصل سونے کا لوٹا راولپنڈی کے صرافہ بازار میں پیتل کے لوٹے سے بدلوا کر، اس پر سونے کی قلعی چڑھوا کر توشہ خانہ میں جمع کروایا اور اصلی لوٹا اپنے پاس رکھ لیا۔ فیاض الحسن چوہان کے مطابق یہ عمل ان کے "کرپشن کے لیول” کی نشاندہی کرتا ہے۔

سابق صوبائی وزیر نے مزید کہا کہ ملائیشیا سے ملنے والا پرچ اور پلالیوں کا ڈنر سیٹ بھی راولپنڈی کے راجا بازار میں بیچ دیا گیا۔ انہوں نے عمران خان کو "لوٹا چور” قرار دیتے ہوئے کہا کہ وہ ذاتی مفاد کیلئے قومی وقار اور سلامتی کو قربان کرنے پر آمادہ ہیں، اور آزادی و دفاع کے دنوں پر بھی صرف اپنی رہائی کی فکر کرتے ہیں۔

یاد رہے کہ فیاض الحسن چوہان کو 2022 میں عمران خان نے اپنا میڈیا ایڈوائزر مقرر کیا تھا۔