حکومت سیلاب متاثرین کےلیے بین الاقوامی امداد کی اپیل کرے : بلاول بھٹو
چیئرمین پیپلزپارٹی بلاول بھٹو زرداری کا کہنا ہے کہ ہم وفاقی حکومت سے مطالبہ کرتے ہیں کہ سیلاب متاثرین کےلیے بین الاقوامی امداد کی اپیل فوری طور پر کی جائے۔ اقوام متحدہ کے نظام کے تحت بین الاقوامی امداد کےلیے اپیل میں تاخیر ناقابلِ فہم ہے۔
سوشل میڈیا پر جاری بیان میں چیئرمین پیپلز پارٹی بلاول بھٹو نے کہا کہ بین الاقوامی امداد کی اپیل نہ کر کے کروڑوں متاثرین کو اس امداد سے محروم رکھنے کا کوئی جواز نہیں۔
بلاول بھٹو زرداری نے کہاکہ ہم وفاقی حکومت کی جانب سے پیپلز پارٹی کے مطالبے پر ماحولیاتی اور زرعی ایمرجنسی کے اعلان کا خیر مقدم کرتےہیں لیکن یہ قابل افسوس ہےکہ وفاقی حکومت اب تک گلگت بلتستان،خیبر پختونخوا،پنجاب اور بالخصوص جنوبی پنجاب کے متاثرہ اضلاع کےلیے بینظیر انکم سپورٹ پروگرام کے تحت کسی ریلیف کا اعلان نہیں کرسکی۔
ان کا کہنا تھاکہ حکومت کی جانب سے اقوام متحدہ کے نظام کے تحت بین الاقوامی امداد کےلیے اپیل میں تاخیر ناقابلِ فہم ہے،اس سطح کی آفات کے دوران دنیا بھر میں بین الاقوامی امداد کی اپیل ایک معمول کی پریکٹس ہے جیساکہ 2022 کے سیلاب کے دوران اس وقت کیاگیا جب وہ وزیرخارجہ تھے۔
چیئرمین پیپلزپارٹی نے کہا کہ پاکستان نے اس سے قبل 2010 کے سیلاب اور 2005 کے زلزلے کےوقت بھی بین الاقوامی امداد کےلیے اپیلیں کی تھیں،دنیا بھر کے ممالک ایسی قدرتی آفات کے ابتدائی 72 گھنٹوں کے دوران عالمی برادری سے مدد کی اپیل کرتےہیں۔
بلاول بھٹو نے واضح کیاکہ پیپلز پارٹی متاثرین سیلاب کےلیے تمام صوبائی اسمبلیوں،قومی اسمبلی اور سینیٹ میں قراردادیں پیش کرےگی۔
