نائب وزیراعظم اسحاق ڈار کی دورہ قطر میں اہم ملاقاتیں
نائب وزیراعظم و وزیر خارجہ اسحاق ڈار ایمرجنسی ’عرب اسلامک سمٹ‘ کے وزرائے خارجہ کے اجلاس کے لیے دوحہ میں موجود ہیں، جہاں وہ مختلف عالمی رہنماؤں سے ملاقاتوں کا سلسلہ جاری رکھے ہوئے ہیں۔
نائب وزیراعظم و وزیر خارجہ سینیٹر محمد اسحاق ڈار نے ملائیشیا کے وزیر خارجہ محمد حسن اور ایران کے وزیر خارجہ عباس عراقچی سے الگ الگ ملاقاتیں کیں۔
ملاقاتوں میں اسرائیل کے قطر اور دیگر مسلم ممالک پر حملوں کی شدید مذمت کی گئی اور انہیں عرب ممالک کی خودمختاری و بین الاقوامی قوانین کی سنگین خلاف ورزی قرار دیا گیا۔رہنماؤں نے فلسطینی عوام کی جائز جدوجہد آزادی کے لیے غیر متزلزل حمایت کا اعادہ کرتے ہوئے مسلم امہ کے اتحاد پر زور دیا۔
عرب لیگ اور او آئی سی کے کلیدی کردار کو اجاگر کیا اور عرب اسلامک سمٹ کو موجودہ نازک صورتحال میں بروقت اور اجتماعی لائحہ عمل کے لیے ناگزیر قرار دیا۔
