عمران خان کی فوج مخالف تقریر سے ذہین سازی ہوئی،مجرموں کااعتراف

عمران خان کی فوج مخالف تقریر سے ذہین سازی ہوئی،سانحہ 9 مئی کے مجرموں نےاعترافی بیانات میں عمران خان کی فوج مخالف تقریر اور دیگر رہنماؤں کےاکسانے کو ذمے دار قرار دیدیا۔

فوجی عدالت کی جانب سےسانحہ 9 مئی کے 25 مجرموں کو سزائیں سنا دی گئی ہیں۔ ترجمان پاک فوج کےمطابق فیلڈ جنرل کورٹ مارشل نے پہلے مرحلے میں 25 ملزمان کو تمام شواہد کی جانچ پڑتال اور مناسب قانونی کارروائی کی تکمیل کے بعد سزائیں سنائی گئی ہیں۔

آئی ایس پی آرکے مطابق سزاپانےوالےملزمان کو قانونی تقاضےپورےکرنے کیلئےقانونی حقوق بھی فراہم کیےگئے ہیں۔

اعلامیے کے مطابق 9 مئی 2023 کو قوم نے سیاسی طور پر بھڑکائے گئے اشتعال انگیز تشدد اور جلاؤ گھیراؤ کے افسوسناک واقعات دیکھے، 9 مئی کے پرتشدد واقعات پاکستان کی تاریخ میں ایک سیاہ باب کی حیثیت رکھتے ہیں۔

اعلامیے میں مزید کہا گیا کہ نفرت اورجھوٹ پر مبنی پہلےسےچلائے گئے سیاسی بیانیے کی بنیاد پر مسلح افواج کی تنصیبات بشمول شہدا کی یادگاروں پرمنظم حملے کیے گئے اور اُن کی بے حرمتی کی گئی۔یہ پُرتشدد واقعات پوری قوم کیلئےصدمہ ہیں۔

جناح ہاؤس حملے میں ملوث پی ٹی آئی کےشرپسند جان محمد خان کو 10 سال قید بامشقت کی سزا  سنائی گئی ہے۔اپنےاقرار جرم میں مجرم جان محمد خان نے اعتراف کیا کہ وہ جناح ہاؤس پرحملےمیں ملوث تھا  اور اس نے ملٹری یونیفارم کی شرٹ پہن کر ویڈیو بنائی اور پھرشرٹ کو جلا دیا۔

پی ٹی آئی شدت پسند شان علی کو بھی10 سال قید بامشقت کی سزا  سنائی گئی ہے۔ مجرم علی شان نے اقرار جرم میں کہا کہ عمران خان کی آرمی مخالف تقاریر سے میری ذہن سازی ہوئی۔ جب عمران خان کی گرفتاری ہوئی تو سیاسی رہنماؤں کے ورغلانے پر میں نے جناح ہاؤس پر حملہ کیا۔میں نے جناح ہاؤس میں جا کر توڑ پھوڑ کی۔

شرپسند بابر جمال خان کوایم ایم عالم بیس میانوالی پر حملے میں 10 سال قید بامشقت کی سزا  سنائی گئی ہے۔مجرم  نےاعترافی بیان میں بتایا کہ میں میانوالی بیس پر حملے میں ملوث تھا اور میں اپنا جرم قبول کرتا ہوں۔

ملزم  داؤد خان کو جناح ہاؤس حملے میں 10 سال قید بامشقت کی سزا  سنائی گئی ہے، مجرم داؤد خان نے بھی اپنے اعتراف جرم میں بتایا کہ میں نے یاسمین راشد اور حسان نیازی کے اُکسانے پر جناح ہاؤس پر حملہ کیا۔ تقاریر کے ذریعے ہمارے ذہنوں میں فوج کیخلاف نفرت پیدا کی گئی،میں اپنا جرم قبول کرتا ہوں ۔

شرپسند محمد حاشر کو 6 سال قیدبا مشقت کی سزا  سنائی گئی ہے، جس نے اپنے اعترافی بیان میں بتایا کہ میں نے9 مئی کو جناح ہاؤس پر حملہ کیا اور انقلاب کے نام پر لوگوں کو اکسایا اور ویڈیوز بنائیں۔ مجرم نے کہا کہ جناح ہاؤس پر حملے کی منصوبہ بندی پہلے سرزمین پارک میں  یاسمین راشد کی قیادت میں کی گئی۔

مجرم فہیم حیدر کو بھی 6 سال قید بامشقت کی سزا سنائی گئی،اعترافی بیان میں کہا کہ پی ٹی آئی قیادت نے جناح ہاؤس حملے کے لیے میری ذہن سازی کی۔

مجرم  عاشق خان کو4 سال قیدبامشقت کی سزا  سنائی گئی، جس نے اعتراف کیا کہ 9 مئی کو ہمیں پی ٹی آئی قیادت کی جانب سے جناح ہاؤس پر حملے کے لیے اکسایا گیا۔ میں جناح ہاؤس میں داخلے ہوا اور وہاں کے سامان کو اٹھا کر ویڈیو بنوائی۔ ہمیں زمان پارک میں فوج کیخلاف حملے کیلئےٹریننگ ملتی رہی۔

پی ٹی آئی کے شرپسند مجرم محمد بلاول کو 2 سال قید با مشقت کی سزا  سنائی گئی، جس نےاعترافی بیان میں بتایا کہ ‘9 مئی کو پی ٹی آئی قیادت کے اکسانے پر میں نے جناح ہاؤس حملے میں حصہ لیا اور توڑ پھوڑ کی۔ پی ٹی آئی قیادت بشمول ڈاکٹر یاسمین راشد کی تقاریر سے میری ذہن سازی ہوئی۔