بھارت کا افغانستان کے ساتھ سفارتی تعلقات بحال کرنے کا اعلان

بھارت نے افغانستان کے ساتھ سفارتی تعلقات بحال کرنے کا اعلان کرتے ہوئے کابل میں اپنے ٹیکنیکل مشن کو سفارت خانے کا درجہ دینے کا اعلان کر دیا ہے۔

انڈین میڈیا رپورٹس کے مطابق بھارتی وزیر خارجہ سبرامنیم جے شنکر نے بھارت کے دورے پر موجود افغان وزیر خارجہ امیر خان متقی کے ساتھ ملاقات میں اعلان کیا ہے کہ بھارت, کابل میں اپنے ٹیکنیکل مشن کو اپ گریڈ کر کے اسے سفارت خانے میں تبدیل کرے گا۔

بھارتی وزیر خارجہ جے شنکر نے کہا ہے کہ بھارت افغانستان کی خودمختاری، علاقائی سالمیت اور آزادی کےلیے مکمل طور پر پرعزم ہے ۔

سبرامنیم جے شنکر نے افغانستان کی ترقی اور خوش حالی میں بھارت کی گہری دلچسپی کا اظہار کرتےہوئے اس بات کی یاد دہانی کروائی ہےکہ بھارت پہلے ہی افغانستان میں کئی ترقیاتی منصوبوں کی پشت پناہی کررہا ہے۔

جے شنکر نے افغانستان میں مزید چھ نئے منصوبوں کے آغاز کا بھی اعلان کیا ہے۔

بھارتی وزیر خارجہ نے افغانستان میں صحت کے شعبےمیں بھارت کی معاونت کا ذکر کیا،خاص طور پر کووڈ-19 کی وبا کے دوران، اور خیرسگالی کے طور پر 20 ایمبولینسز عطیہ کرنےکا اعلان کیا، اس کے علاوہ بھارت جدید طبی آلات، ویکسین اور کینسر کی ادویات کی فراہمی بھی کرے گا۔

یاد رہے کہ بھارت نے 2021 میں طالبان کے اقتدار سنبھالنے کےبعد کابل میں اپنا سفارت خانہ بند کردیا تھا، تاہم ایک سال بعد تجارت،طبی امداد اور انسانی ہمدردی کی سرگرمیوں کےلیے ایک چھوٹا مشن دوبارہ قائم کیاگیا تھا۔