بھارت نے پورے خطے پر جنگ مسلط کی ، پاکستان نے ثابت کر دیا کہ عزت اور وقار پر کوئی سمجھوتہ نہیں ہوگا،ترجمان دفتر خارجہ

ترجمان دفتر خارجہ شفقت علی خان نے کہا کہ بھارت نے پورے خطے پر  جنگ مسلط کی جبکہ  پاکستان نے بھارتی جارحیت کا بھرپور جواب دیا۔

صحافیوں کوبریفنگ دیتے ہوئے ترجمان دفترخارجہ شفقت علی خان کاکہنا تھا پاکستان نےثابت کیا کہ عزت اور وقار پر کوئی سمجھوتہ نہیں ہوگا،بھارتی جارحیت کےخلاف آپریشن بنیان مرصوص کا آغاز کیا گیا،پاکستان کی مسلح افواج نے بھارت کے 6 جنگی طیارےگرائے۔

ترجمان دفتر خارجہ کا کہنا تھا متعدد دوست ممالک کی کوششوں سے جنگ بندی ممکن ہوئی، سیز فائر کے لیے دوست ممالک کے کردار کو سراہتےہیں،مستقبل میں بھی کوئی جارحیت کی گئی تو اس کا بھرپور جواب دیا جائے گا۔

ترجمان دفترخارجہ نےافغان وزیر دفاع کے بھارت کے مبینہ خفیہ دورے پر تبصرہ کرنے سے گریز کرتے ہوئے کہا کہ ہم بھارت اور افغانستان کوخودمختاراورآزاد ریاستیں تسلیم کرتے ہیں، علاقائی امن کے لیے باہمی احترام اورعدم مداخلت کی پالیسی ضروری ہے۔

قومی اسمبلی : انکم ٹیکس ترمیمی بل سمیت دیگر بل کثرت رائے سے منظور

ترجمان دفتر خارجہ شفقت علی خان کا کہنا تھا کہ ہم کسی ملک کے دوسرےممالک سےتعلقات پر تبصرہ نہیں کرتے، ہر ریاست کو خود مختار حیثیت میں اپنی خارجہ پالیسی بنانے کا حق حاصل ہے۔

ان کا کہنا تھا پاکستان مسائل کے پر امن حل پر یقین رکھتا ہے،دوست ممالک سے توقع رکھتے ہیں کہ ان کے تعلقات پاکستان کے خلاف استعمال نہ ہوں، پاکستان ایک خودمختار ریاست ہے اوراپنی سالمیت کے تحفظ کا حق رکھتا ہے، یورپی وزرا کے دورہ پاکستان اور بھارت دونوں میں توازن دیکھا جانا چاہیے۔