بھارت کی پانی بند کرنے کی دھمکی پاکستان کو اشتعال دلانے کی کوشش ہے : بلاول بھٹو
پاکستانی سفارتی وفد کے سربراہ بلاول بھٹو نے کہا ہے کہ بھارت پانی کو بطور ہتھیار استعمال کررہا ہے۔ بھارت کی پانی بند کرنے کی دھمکی پاکستان کو اشتعال دلانے کی کوشش ہے۔
برسلز میں پریس کانفرنس کرتےہوئے پاکستانی سفارتی وفد کے سربراہ بلاول بھٹو زرداری نے کہاکہ پاکستان امن کا خواہاں ہے۔ پاک بھارت کشیدگی کے بعد وزیراعظم نے وفد تشکیل دیا۔ بھارت پانی کو بطور ہتھیار استعمال کررہا ہے۔
بلاول بھٹو نے کہاکہ امن کی بات کرنے کےلیے آیا ہوں، ایٹمی طاقتیں ہونے کے باوجود پاک بھارت کشیدگی تیزی سے بڑھی، جنگ کسی مسئلے کا حل نہیں۔ پاکستان جامع مذاکرات پر یقین رکھتا ہے۔
انہوں نے کہا کہ بھارت کی جانب سے پانی بند کرنے کی دھمکی پاکستان کو اشتعال دلانے کی کوشش ہے۔ بھارت ہر بار مذاکرات اور بات چیت سے راہ فرار اختیار کرتاہے۔بھارت کے ساتھ تنازع سے پہلے خطہ جتنا محفوظ تھا اب نہیں ہے۔
انہوں نے کہاکہ پہلگام واقعے پر بھارت کو غیرجانبدار تحقیقات کی پیشکش کی۔ بھارت کے ساتھ جنگ بندی تو ہوگئی لیکن امن حاصل نہیں ہوا۔مذاکرات نہیں ہوں گے تو دن بدن کشیدگی میں اضافہ ہوگا۔
بلاول بھٹو نے کہاکہ ہم اسرائیل اور ایران جنگ کے متحمل نہیں ہو سکتے۔ عالمی برادری اسرائیل اور ایران کے درمیان جنگ بندی کےلیے کردار ادا کرے۔ پاکستان ہمیشہ پائیدار امن کی بات کرتا رہے گا۔
