پی ٹی آئی کے مطالبات پر7روز میں تفصیلی جواب دیں گے،عرفان صدیقی

حکومتی کمیٹی کےترجمان سینیٹر عرفان صدیقی نےکہا ہے کہ پی ٹی آئی کے 9 مئی اور 26 نومبر پر جوڈیشل کمیشن سمیت دیگر مطالبات پر 7 روز میں تفصیلی جواب دیں گے تاہم جوڈیشل کمیشن بنانے کا حتمی فیصلہ نہیں ہوا۔
پی ٹی آئی کےساتھ مذاکرات کے لیے قائم حکومتی کمیٹی کااجلاس ختم ہوگیا۔
کمیٹی کے ترجمان عرفان صدیقی کاجوڈیشل کمیشن کےبارے میں کئے گئے سوال پر کہنا تھا کہ ابھی حتمی فیصلہ نہیں ہوا، اس معاملے پر مشاورت جاری ہے۔
خیال رہے کہ پی ٹی آئی کی جانب سے گزشتہ روز کہا گیا تھا کہ 7 روز میں 9 مئی اور 26 نومبر کے واقعات پر عدالتی کمیشن قائم نہیں کیا گیا تو مذاکرات کا اگلا دور نہیں ہوگا۔
یاد رہے کہ پی ٹی آئی کے چیئرمین بیرسٹر گوہر نے گزشتہ روز اڈیالہ جیل کے باہر میڈیا سے گفتگو میں کہا تھا کہ ہم حکومت کےساتھ مذاکرات جاری رکھنا چاہتے ہیں لیکن ہماری شرط ہے کہ جوڈیشل کمیشن بنایا جائے، عمران خان نے کہا ہے 7 دن میں کمیشن نہ بنا تو چوتھی میٹنگ نہیں ہوگی۔
چیئرمین پی ٹی آئی بیرسٹر گوہر کا کہنا تھا کہ ہم حکومت کا انتظارکررہے ہیں وہ کیا پیش رفت بتاتے ہیں، اگر کمیشن نہیں بننے جارہا تو مذاکرات کا کوئی فائدہ نہیں ہوگا، حکومت گھبراہٹ کا شکار ہے کیونکہ یہ فارم47 کی حکومت ہے،حکومت کو مذاکرات پر توجہ دینی چاہیے۔
بیرسٹرگوہرکا کہنا تھا کہ ہم سمجھتے ہیں مذاکرات کی کامیابی پاکستان کی کامیابی ہے، میں ہمیشہ کہتاہوں تحمل اور برداشت کےساتھ مذاکرات پر فوکس کرنا چاہیے، بات آگے بڑھانے کیلئےجلد بازی کے بجائے تحمل سےکام لینا ہوگا۔