قطر پر اسرائیلی بمباری بین الاقوامی قوانین کی سنگین خلاف ورزی ہے : ایاز صادق
سپیکر قومی اسمبلی سردار ایاز صادق نے قطر پر اسرائیلی بمباری کی شدید مذمت کرتے ہوئے اسے بین الاقوامی قوانین اور انسانی حقوق کی کھلی خلاف ورزی قرار دیا ہے۔
سپیکر قومی اسمبلی ایاز صادق نے کہا کہ اسرائیل کا قطر پر حملہ اُس کی خودمختاری اور سالمیت پر حملہ ہے،جو کسی صورت قابل قبول نہیں۔
انہوں نے عالمی برادری سے مطالبہ کیا کہ وہ اسرائیلی جارحیت کا فوری نوٹس لے اور قطر کے نہتے عوام کے تحفظ کو یقینی بنائے۔
سردار ایاز صادق کا کہنا تھا کہ اسرائیلی فسطائیت پورے خطے کے امن اور استحکام کے لیے ایک سنگین خطرہ بن چکی ہے۔ اسرائیل کے ہاتھ لاکھوں بےگناہ فلسطینیوں کے خون سے رنگے ہوئے ہیں، اور اسرائیلی دہشت گردی پر عالمی برادری کی خاموشی ایک لمحۂ فکریہ ہے۔
انہوں نے کہا کہ اسرائیل مسلسل عالمی قوانین کی خلاف ورزی کررہا ہے، جس پر فوری اور مؤثر ردِعمل ضروری ہے۔
سپیکر قومی اسمبلی نے قطر کی پارلیمان اور عوام سے مکمل یکجہتی کا اظہار کرتے ہوئے کہا کہ پاکستان کی پارلیمان اور عوام قطر کے ساتھ کھڑے ہیں۔
