خیبرپختونخوا: سکیورٹی فورسز کا کامیاب آپریشن، ایک خارجی ہلاک
خیبرپختونخوا کے ضلع باجوڑ میں سکیورٹی فورسز نے کامیاب آپریشن کرتے ہوئے ایک خارجی کو ہلاک کردیا جب کہ اس کے دیگر ساتھی زخمی حالت میں فرار ہوگئے۔
خیبرپختونخوا میں دہشت گردوں کےخلاف تابڑ توڑ کارروائیاں جاری ہیں، سکیورٹی فورسز نے ضلع باجوڑ میں فائرنگ کے تبادلے میں ایک دہشت گرد کو ہلاک کر دیا جب کہ دیگر زخمی حالت میں فرار ہوگئے۔
ذرائع کے مطابق شاہی تنگی جنگل میں موجود دہشت گردوں کے ٹھکانوں اور سرنگوں کا مکمل صفایا کر دیا گیا ہے،سکیورٹی فورسز نے شاہی تنگی کے جنگل میں موجود غار پر گھات لگاکر بھرپور کارروائی کی،اس موقع پر دہشت گردوں اور فورسز کے درمیان شدید فائرنگ کا تبادلہ بھی ہوا۔فائرنگ کے نتیجے میں ایک دہشت گرد ہلاک جب کہ دیگر زخمی حالت میں فرار ہوگئے۔
سکیورٹی فورسز نے علاقے میں موجود سرنگوں اور قریبی مقامات کو بھی کلیئر کر دیا اور دہشت گردوں کے زیراستعمال اسلحہ،بارودی مواد اور مواصلاتی آلات بھی برآمد کرلیے۔
