ن لیگ کے پی ٹی آئی اورعمران خان پرمنی لانڈرنگ کے الزامات
ن لیگ کے پی ٹی آئی اورعمران خان پرمنی لانڈرنگ کے الزامات
مسلم لیگ ن کی ترجمان مریم اورنگزیب نے کہا ہے کہ ملک میں اصل سازش 2008 سے 2013 کے درمیان ہوئی ، جس میں ملک کے میں26 غیرملکی فنڈنگ کے خفیہ اکاؤنٹس کے ذریعے باہر سے منی لانڈرنگ کر کے پیسہ منگوایا گیا.
اسلام آباد میں پریس کانفرنس سے خطاب کرتے ہوئے انکا کہنا تھا کہ وزیر اعظم عمران خان کیخلاف تحریک عدم اعتماد پارلیمان جبکہ اجلاس کی ریکوزیشن اراکین اسمبلی کے دستخط کے ساتھ ایوان میں جمع کرائی جاچکی ہے۔انہوں نے کہا تحریک عدم اعتماد جمع ہونے کے بعد اخلاقی طور پر اب عمران خان کو کوئی خطاب نہیں کرنا چاہیے
.انہوں آج کراچی میں خطاب کے دوران جو غنڈہ گردی ، دھمکیاں اور جس قسم کی وہ بات کر رہے تھے اس سے لگ رہا ہےکہ ان کا ذہنی توازن ٹھیک نہیں.عمران خان کے خطاب سے تحریک عدم اعتماد کی کامیابی کی خوشخبری عوام کو مل چکی ہوگی، ان کی شکست ان کے چہرے، باڈی لینگویج، بیان اور تقریر سے ظاہر ہو چکی ہے، عوام کو یہ خوشخبری مل چکی ہے کہ جو نالائق، چور اور کرپٹ ٹولا عمران صاحب کی شکل میں ساڑھے 3 سال قبل عوام پر مسلط کیا گیا تھا، وہ جاچکا ہے اور آج کے بیان سے واضح ہو چکا ہے کہ ان کی سیاسی موت ہو چکی ہے۔
ترجمان مسلم لیگ کا کہنا تھا کہ عمران خان آج اپنے ٹارگٹ بتاتے رہے تھے،انہوں جب ٹارگٹ کی بات کی تو میں سمجھی کہ آٹے کی قیمت کم کرنے کا اعلان کرینگے، اوردوسرا ٹارگٹ چینی کی قیمت کم کرنے کا اعلان ہو گا، 50 لاکھ گھروں اور ایک کروڑ نوکریوں کے بارے میں موصوف کچھ بتائیں گے لیکن ٹارگٹ پر آج بھی سیاسی حریفوں پر وہی جھوٹے الزامات، گندی زبان اور گالم گلوچ تھی۔
انہوں نے کہا کہ گالیاں اور دھمکیاں دینے سے تحریک عدم اعتماد پر کوئی فرق پڑے گا، عمران خان نے کہا کہ میں جیل میں ڈالوں گا لیکن آپ نے ساڑھے تین سال کیا کیا ہے، سیاسی حریفوں کو جیلوں میں ڈالا، ان کی بہنوں اور بیٹیوں کو ہتھکڑیاں لگائیں تو جیل کی دھمکیاں کس کو دے رہے ہیں؟ جیل کی دھمکی اس کو دیں جس نے عوام کا آٹا، چینی، بجلی، گیس اور دوائی چوری کی، اب جیل میں جانے کا وقت اس کا ہے۔انہوں نے کہا کہ کچھ عرصے سے ذکر ہو رہا ہے کہ بیرون ملک سازش ہو رہی ہے، بیرونی قوتیں سازشیں کرکے عمران خان کو ہٹانے کی کوشش کر رہی ہیں لیکن ان کو کیونکر ہٹایا جائے گا، انہوں نے سی پیک بند کردیا، آپ نے کشمیر کے سودے پر آواز بلند نہیں کی، آئی ایم ایف کی منتیں کر کے معاشی سلامتی اور خودمختاری ان کے حوالے کر دی۔
فنانشل ایکشن ٹاسک فورس (ایف اے ٹی ایف) پر انہوں نے منتیں کیں، کوئی ایسا انٹرنیشنل فورم نہیں چھوڑا جہاں بھیک نہ مانگی ہو، ملکی معیشت کو کمزور کیا، کرائے کے ترجمانوں نے جو بیرون ملک سازش کی رٹ لگائی ہوئی ہے تو یہ بتائیں کہ کیا ملک میں آٹا 35 سے 85 روپے ہو جائے تو کیا یہ بیرون ملک سازش ہے، چینی 52 سے 130 روپے کلو ہو جائے کیا یہ بیرون ملک سازش ہے، ملک میں قلت پیدا کر کے اسے برآمد کرنا اور پھر دگنی قیمت پر درآمد کرنا بیرونی سازش ہے۔ آپ اپنی غلطی کو بیرون ملک سازش پر ڈال رہے ہیں، آپ وہ شخص ہیں جس نے کبھی اپنی غلطی نہیں مانی، آج آپ کے اپنے ارکان اور اتحادی آپ کا ساتھ چھوڑ رہے ہیں تو یہ بیرون ملک سازش نہیں آپ کا اعمال نامہ ہے، آپ جو ساڑھے تین سال سے عوام کو مہنگائی کی جس چکی میں پیس رہے ہیں یہ ان کا عدم اعتماد ہے۔
مسلم لیگ (ن) کی ترجمان نے کہا کہ ملک میں سازش 2008 سے 2013 کے درمیان ہوئی تھی جس میں ملک کے اندر آپ نے 26 غیر ملکی فنڈنگ کے خفیہ اکاؤنٹس کے ذریعے بیرون ملک سے منی لانڈرنگ کر کے پیسے منگوائے تھے، جب آپ کو ملک پر مسلط کیا گیا تھا تو وہ اس ملک کے خلاف بیرون ملک سازش ہوئی تھی۔
کبھی عرش پرکبھی فرش پرکبھی ان کے درکبھی دربدر، طنزیہ ٹویٹ
مریم اورنگزیب نے دعویٰ کیا کہ عمران خان نے ڈنمارک، جرمنی، سوئٹزرلینڈ، متحدہ عرب امارات، سوئیڈن، نیوزی لینڈ، سنگاپور، ہانگ کانگ، آسٹریا، سعودی عرب، ناروے اور آسٹریلیا سے پیسے آنے والی ترسیلات زر کو الیکشن کمیشن میں ڈکلیئر نہیں کیا گیا، پاکستان کے خلاف اصل بیرون ملک سازش یہ تھی جو آپ نے خفیہ فنڈز کے ذریعے کی۔ پی ٹی آئی کے بیرون ملک امریکا، کینیڈا، آسٹریلیا، برطانیہ، فن لینڈ، ناروے اور نیوزی لینڈ کے دفاتر کے فنڈز کو الیکشن کمیشن میں ڈکلیئر نہیں کیا گیا، اس ملک کے خلاف اصل سازش یہ تھی۔
