خاتون بانجھ ہو تو بتایا، مرد میں مسئلہ ہو تو چھپایا جاتا ہے؟

خواتین اور مردوں کو مساوی حقوق کی فراہمی کی خواہاں اداکارہ سنیتا مارشل نے کہا ہے کہ خاتون بانجھ ہو تو بتایا جاتا ہے جبکہ مرد میں مسئلہ ہو تو چھپا دیا جاتا ہے، اداکارہ نے حال ہی میں ’بی بی سی اردو‘ کو دیے گئے انٹرویو میں سماجی مسائل اور ایسے ہی موضوعات پر بنے اپنے ڈراموں سے متعلق کھل کر بات کی۔
اداکارہ نے بتایا کہ انہیں جیسے ہی ’پنچرہ‘ ڈرامے کا سکرپٹ ملا، تو انہوں نے پڑھنے کے فوری بعد ہی اس میں کام کرنے کا ارادہ کرلیا، کیوںکہ اس کی کہانی سماجی مسائل سے بہت ملتی جلتی ہے اور انہیں ایسا بھی لگا کہ وہ خود بھی کہیں نہ کہیں ڈرامے میں دکھائی گئی کہانی کی طرح ہی ہیں۔
سنیتا مارشل نے ایک سوال کے جواب میں بتایا کہ کامیاب شادی کے لیے مرد کے زائد العمر ہونے کی باتیں دقیانوسی ہیں، حقیقت کا ان سے کوئی تعلق نہیں، شادی کی کامیابی کا عمر سے بھی کوئی واسطہ نہیں۔
اداکارہ نے دلیل دی چوںکہ مرد دیر سے سمجھدار بنتے ہیں، اس لیے معاشرے میں خیال کیا جاتا ہے کہ شوہر کی عمر اپنی بیوی سے زائد ہونی چاہئے، عورتیں جلد سمجھدار ہوجاتی ہیں جبکہ مرد ان کے مقابلے دیر سے میچور بنتے ہیں، اس لیے شادی کے وقت ہر کوئی دلہن کے مقابلے بڑی عمر کا دُلہا تلاش کرتا ہے اور یہ سب معاشرے کے بنائے گئے اصول ہیں۔
سنیتا نے مسکراتے ہوئے انکشاف کیا کہ وہ اپنے شوہر سے ایک سال بڑی ہیں۔ انہوں نے اپنے مختلف مذہب سے تعلق ہونے پر بھی بات کی اور بتایا کہ بچوں نے آج تک ان سے یہ سوال نہیں پوچھا کہ وہ مسلمان کیوں نہیں ہیں؟ اداکارہ دوران انٹرویو اپنے دوسرے ڈرامے ’سر راہ‘ پر بھی بات کی اور بتایا کہ اگرچہ اس ڈرامے میں انہوں نے ایک ہی قسط میں کام کیا لیکن ان کی قسط کی کہانی جاندار تھی۔
اداکارہ کے مطابق ’سر راہ‘ میں کئی پیغامات دیئے گئے، جن میں سے ایک پیغام یہ تھا کہ خواتین جب ڈاکٹری کی تعلیم حاصل کریں تو وہ بطور ڈاکٹر معاشرے کی خدمت بھی کریں، ڈرامے میں انہوں نے ایک لیڈی ڈاکٹر کا کردار ادا کیا ہے، جن کے شوہر کے اسپرم کاؤنٹ کم ہوتے ہیں، جس وجہ سے وہ والد بننے کے قابل نہیں ہوتا لیکن بات کو خفیہ رکھنے کی کوشش کی جاتی ہے، تاہم بعد ازاں ان کے شوہر ہمت کرکے اپنی والدہ کو اپنی کمزوری بتاتے ہیں۔
سنیتا مارشل نے اسی معاملے پر بات کرتے ہوئے کہا کہ معاشرے میں بھی ایسا ہی رویہ پایا جاتا ہے، یہاں شادی شدہ مرد میں کوئی مسئلہ ہو تو خاموشی اختیار کی جاتی ہے، کسی کو کچھ نہیں بتایا جاتا لیکن اگر شادی کے بعد خاتون بانجھ نکلے تو ہر کسی کو بتا دیا جاتا ہے اور اگر شوہر میں کوئی مسئلہ نکل آئے تو خاموشی اختیار کی جاتی ہے۔
خیال رہے کہ سنیتا مارشل نے 2008 میں اداکار حسن احمد سے شادی کی تھی، اداکارہ مسیحی جب کہ حسن احمد مسلمان ہیں اور دونوں آج تک اپنے اپنے مذہب کے پیروکار ہیں، دونوں کی شادی کو 13 سال کا عرصہ گزر چکا ہے، دونوں کے دو بچے بھی ہیں، جن میں سے ایک بیٹا اور ایک بیٹی ہیں جو مذہب اسلام کو فالو کرتے ہیں۔

کیا عمران خان گرفتاری کے بعد مزید خطرناک ثابت ہونگے؟