مدارس رجسٹریشن بل،وزیراعظم نےمولانافضل الرحمان کوملاقات کیلئے بلالیا

وزیراعظم شہبازشریف کا مدارس رجسٹریشن بل کے معاملے پر جمعیت علمائے اسلام کے سربراہ  مولانا فضل الرحمان سے رابطہ،ملاقات کیلئےبلالیا۔

وزیراعظم شہباز شریف نے اس معاملےپرمولانا فضل الرحمان کو کل ملاقات کیلئے مدعو  بھی کرلیا۔مولانا فضل الرحمان کل دوپہر3 بجےوزیراعظم ہاؤس میں شہباز شریف سے ملاقات کریں گے۔جس میں مولانا اتحاد تنظیمات مدارس کا مؤقف وزیراعظم کے سامنے رکھیں گے۔

ذرائع کا کہنا ہے کہ وزیراعظم کےرابطےکےبعد مولانا فضل الرحمان کا مفتی تقی عثمانی سے بھی رابطہ ہوا ہے۔مولانا فضل الرحمان نےمفتی تقی عثمانی سے کل کی ملاقات سے متعلق مشاورت کی۔

واضح رہے کہ گزشتہ روز قومی اسمبلی میں اظہار خیال کرتے ہوئے جمعیت علمائے اسلام کے سربراہ مولانا فضل الرحمان نے کہا تھا کہ مدارس بل اب ایکٹ بن چکا ہے اب ہم کوئی ترمیم قبول نہیں کریں گے اور یہ بات نہ مانی گئی تو پھر ایوان کی بجائے میدان میں فیصلہ ہوگا۔