وزیرِاعظم شہباز شریف سے ملائیشیا کے ہم منصب انور ابراہیم کا ٹیلیفونک رابطہ
وزیرِاعظم محمد شہباز شریف سے ملائیشیا کے ہم منصب انور ابراہیم کاٹیلیفونک رابطہ ،اہم امور پرتبادلہ خیال کیاگیا۔
ترجمان وزیراعظم ہاؤس کے مطابق وزیرِاعظم شہباز شریف نے کوالالمپور کے حالیہ دورے کے دوران دی جانے والی شاندار مہمان نوازی پر ملائیشیا کی قیادت ،عوام کا شکریہ ادا کیا ۔
ٹیلیفونک گفتگو میں شہبازشریف کےدورے کے دوران طے پانے والی مفاہمتیں، خصوصاً حلال گوشت کی برآمد اور دیگر باہمی تعاون کے شعبوں سے متعلق اقدامات، پاکستان اور ملائیشیا کے تعلقات کو نئی بلندیوں تک لے گئے ہیں۔
دونوں رہنماؤں نے علاقائی صورتحال پر بھی تبادلۂ خیال کیا، وزیرِاعظم شہباز شریف نے وزیرِاعظم انور ابراہیم کو غزہ امن معاہدے پر شرم الشیخ میں ہونے والی دستخطی تقریب میں اپنی شرکت سے آگاہ کیا۔
دونوں رہنماؤں نےمعاہدے کا خیرمقدم کرتے ہوئے اس امید کا اظہار کیا کہ یہ اقدام فلسطینی عوام کی مشکلات کے فوری خاتمے، غزہ میں انسانی امداد کی بلا رکاوٹ رسائی اور خطے میں دیرپا امن و استحکام کے لیے راہ ہموار کرے گا۔
وزیرِاعظم نے اپنے ملائیشین ہم منصب کو پاک افغان سرحد کی صورتحال سے بھی آگاہ کیا۔ انہوں نے کہا کہ پاکستان افغانستان میں امن و استحکام کا خواہاں ہے، تاہم اسے افغان سرزمین سے ہونے والی سرحد پار دہشتگردی کا سامنا ہے۔
