پاکستان کی امریکی کمپنیوں کو توانائی، زراعت اور آئی ٹی میں سرمایہ کاری کی دعوت
وفاقی وزیر خزانہ محمد اورنگزیب نے امریکی کمپنیوں کو پاکستان میں تیل، معدنیات، زرعی اور انفارمیشن ٹیکنالوجی کے شعبوں میں سرمایہ کاری کی دعوت دی ہے۔
یہ دعوت انہوں نے واشنگٹن میں امریکی معاون وزیر خزانہ رابرٹ کیپ روتھ سمیت دیگر اعلیٰ حکام سے ملاقات کے دوران دی۔ ملاقات میں وزیر خزانہ نے امریکی حکام کو پاکستان کی معاشی پالیسیوں، ورچوئل اثاثوں سے متعلق حالیہ قانون سازی، اور معاشی استحکام سے متعلق اقدامات سے آگاہ کیا۔
محمد اورنگزیب نے پاکستان اور امریکا کے مابین ٹیرف معاہدے پر ہونے والے کامیاب مذاکرات پر اطمینان کا اظہار بھی کیا۔
دولت مشترکہ وزرائے خزانہ کے اجلاس میں خطاب کرتے ہوئے انہوں نے ماحولیاتی مالیات (Climate Financing) کی اہمیت اور لاس اینڈ ڈیمیج فنڈ کے جلد فعال ہونے کی ضرورت پر زور دیا۔
وزیر خزانہ نے اسلامی ترقیاتی بینک کے صدر ڈاکٹر سلیمان الجاسر سے ملاقات کی، جس میں موٹروے M-6 کے دو حصوں کی مالی منظوری پر شکریہ ادا کیا۔ ملاقات میں پولیو کے خاتمے اور توانائی کے منصوبوں میں تعاون بڑھانے پر بھی اتفاق ہوا۔
علاوہ ازیں، انہوں نے آئی ایف سی کے ریجنل نائب صدر اور سٹی بینک کے نمائندوں سے بھی علیحدہ علیحدہ ملاقاتیں کیں۔ وزیر خزانہ نے یو ایس پاکستان بزنس کونسل کی تقریب میں بھی شرکت کی۔
