پاکستان کو قرضے نہیں، مہارت اور سرمایہ کاری چاہیے،شہبازشریف
وزیراعظم شہبازشریف کا کہنا تھا پاکستان میں معدینات کے بڑے ذخائر موجود ہیں، سرمایہ کاروں کو دعوت دیتا ہوں آئیں اور سرمایہ کاری کریں، پاکستان کو قرضے نہیں، مہارت اور سرمایہ کاری چاہیے۔
پاک چین دوستی کے 75سال مکمل ہونے کی خوشی میں چین کے شہر ہانگژو میں پاک چین بزنس ٹو بزنس فورم سے خطاب کرتے ہوئے وزیراعظم شہباز شریف کا کہنا تھا پاک چین دوستی سمندر سے گہری، ہمالیہ سے بلند اور اب آسمانوں کو چھو رہی ہے۔
وزیراعظم شہباز شریف کا کہنا ہے پاکستان جلد خطے میں ترقی کے سفر میں چین کا ہم قدم ہوگا۔خوبصورت شہر ہانگژو صدر شی جن پنگ کے وژن کا نتیجہ ہے، صدر شی جن پنگ نے چین کو عالمی معاشی و عسکری طاقت بنایا، پاکستان جلد خطے میں ترقی کے سفر میں چین کا ہم قدم ہوگا، 30 فیصد ایم او یوز معاہدوں میں بدل چکے، جن کی مالیت اربوں ڈالر ہے۔
ان کا کہنا تھا پاکستان کی نوجوان آبادی کو آئی ٹی ٹریننگ اور عالمی سرٹیفکیشن دے رہےہیں، چین کے ساتھ تعاون کے چار شعبے زراعت، آئی ٹی، اکنامک زونز، مائنز اینڈ منرل اہم ہیں، ایم او یوز کو تیزی سے معاہدوں میں بدلنا وقت کی ضرورت ہے۔
وزیراعظم پاکستان کا کہنا تھا اکنامک زون میں ون ونڈو آپریشن اور ریڈ کارپیٹ ٹریٹمنٹ ملے گا، کراچی میں 6 ہزار ایکڑ پر ورلڈ کلاس اسپیشل اکنامک زون بنا رہے ہیں۔
