پنجاب اسمبلی:ایم پی ایز کی تنخواہوں میں اضافے کا بل منظور

پنجاب اسمبلی نے اراکین اسمبلی کی تنخواہوں میں اضافے کا بل کثرت رائے سے منظور کرلیا گیا

 ایک ایم پی اے کی تنخواہ 4 لاکھ ہوجائے گی، بل پراپوزیشن لیڈر احمد خان بھچر نے اعتراض اٹھادیا۔

پنجاب میں اسمبلی میں اراکین اسمبلی کی تنخواہوں میں اضافے کا پیش کردہ بل کثرت رائے سے منظور کرلیا گیا، منظوری کے بعد یکم جنوری سے اراکین اسمبلی کی ماہانہ تنخواہ4 لاکھ روپےہوجائے گی۔

تنخواہوں میں اضافےکےبل کی منظوری کے بعد اراکین اسمبلی بےحد خوش نظرآئے اور انہوں نے ایک دوسرے کو مبارکباد دی۔

بل کی منظوری کے بعد اراکین پنجاب اسمبلی کی تنخواہ76 ہزار سےبڑھا کر4 لاکھ کر دی گئی ہے جبکہ صوبائی وزراء کی تنخواہ1 لاکھ سےبڑھا کر9 لاکھ60 ہزار کر دی جائے گی۔

اسی طرح اسپیکرپنجاب اسمبلی کی تنخواہ1 لاکھ25 ہزار سے بڑھ کر9 لاکھ50 ہزار اور ڈپٹی اسپیکر کی تنخواہ1 لاکھ20 ہزار سے بڑھ کر7 لاکھ75 ہزار ہوجائے گی۔

پارلیمانی سیکرٹریز کی تنخواہ 83 ہزار سے بڑھ کر4 لاکھ51 ہزاراور اسپیشل اسسٹنٹ کی تنخواہ1 لاکھ سے بڑھا کر6 لاکھ65 ہزار ہوجائے گی۔

بل کی منظوری کےبعد اب ایڈوائزر کی تنخواہ1 لاکھ سے بڑھ کر 6 لاکھ 65 ہزار ہوجائے گی۔

دریں اثنا تنخواہوں میں اضافہ کے بل پر اپوزیشن لیڈر احمد خان بھچر نے اعتراض اٹھا دیا، انہوں نے کہا کہ کیا یہ بل پارلیمانی قوانین ایکٹ 1972ء کے مطابق ہے۔

ان کے اعتراض کےجواب میں اسپیکر ملک احمد خان نے کہا کہ یہ بل موجودہ قوانین کے مطابق بالکل درست ہےاورحکومت کا اچھا اقدام ہے۔