شہید صحافی ارشد شریف کی والدہ رفعت آراء علوی انتقال کر گئیں

شہید صحافی ارشد شریف کی والدہ رفعت آراء علوی انتقال کر گئیں۔ ان کے انتقال کی خبر پر ملک بھر میں صحافتی حلقوں اور عوام نے گہرے دکھ اور افسوس کا اظہار کیا ہے۔

وزیر اعلیٰ خیبر پختونخوا محمد سہیل آفریدی نے مرحومہ کے انتقال پر گہرے رنج و افسوس کا اظہار کرتے ہوئے کہا کہ ارشد شریف کی والدہ ایک بہادر اور عظیم ماں تھیں جنہوں نے سچائی اور اصول پسندی کا علم بلند رکھنے والا بیٹا پروان چڑھایا۔

انہوں نے کہا کہ شہید ارشد شریف جیسے جری، بااصول اور نڈر صحافی قوم کا فخر ہیں، جنہوں نے حق اور سچ کے لیے اپنی جان قربان کر دی۔ ان کی والدہ بھی ایک عظیم ماں تھیں جنہوں نے صبر، استقامت اور ایمان کی مثال قائم کی۔

وزیر اعلیٰ نے مرحومہ کے لیے بلندی درجات اور لواحقین کے لیے صبرِ جمیل کی دعا کی۔ ان کا کہنا تھا کہ “ارشد شریف کی قربانی پاکستانی صحافت کی تاریخ میں سنہری حروف سے لکھی جائے گی، قوم ان کے کردار اور ان کی والدہ کی عظمت کو ہمیشہ یاد رکھے گی۔”