اسلام آباد اور راولپنڈی میں احتجاج کے باعث بند سڑکیں جزوی طور پر کھول دی گئیں
وفاقی دارالحکومت اسلام آباد اور جڑواں شہر راولپنڈی میں مذہبی جماعت کے احتجاج کے سبب بند کی گئی سڑکوں میں سے چند اہم راستے عوامی مشکلات کے پیش نظر جزوی طور پر کھول دیے گئے ہیں۔
اسلام آباد ایکسپریس وے اور نائنتھ ایونیو سے ڈبل روڈ کی جانب جانے والا راستہ اب محدود حد تک ٹریفک کے لیے بحال کر دیا گیا ہے، تاہم فیض آباد انٹرچینج بدستور سیل ہے۔ آئی جی پی روڈ پر بھی آمد و رفت معطل ہے۔
راولپنڈی میں شہر کے اندرونی علاقوں کو جانے والے کئی راستے کھول دیے گئے ہیں جبکہ مری روڈ سے منسلک گلیوں سے بھی رکاوٹیں ہٹا دی گئی ہیں۔ ٹریفک پولیس کے مطابق راولپنڈی کے 43 میں سے 6 مقامات مکمل طور پر اور 35 مقامات جزوی طور پر بحال کر دیے گئے ہیں۔
موٹروے پولیس کا کہنا ہے کہ ایم 2 موٹروے (لاہور تا اسلام آباد) کو عام ٹریفک کے لیے کھول دیا گیا ہے اور گاڑیوں کی آمدورفت معمول کے مطابق جاری ہے۔
میٹرو بس سروس اور دیگر مقامی ٹرانسپورٹ سروسز تاحال بند ہیں، جس کے باعث شہریوں کو شدید مشکلات کا سامنا ہے اور ریلوے اسٹیشن پر مسافروں کا ہجوم بڑھ گیا ہے۔
گزشتہ روز جڑواں شہروں کے مختلف علاقوں میں شہریوں اور پولیس اہلکاروں کے درمیان تلخ کلامی کے واقعات بھی پیش آئے۔ کئی ایمبولینسیں سڑکوں پر پھنس گئیں، مریضوں کے لواحقین راستے کی التجا کرتے رہے۔ ایک خاتون اپنے بیمار بچے کو ہسپتال نہ لے جا سکنے پر روتی رہی، جبکہ ایک ضعیف مریض کو ایمبولینس میں ہی ڈرپ لگا کر طبی امداد فراہم کی گئی۔
