پنجاب بھر میں دفعہ 144 کے نفاذ میں مزید سات روزہ توسیع
پنجاب بھر میں دفعہ 144 کے نفاذ میں مزید سات روز کی توسیع کر دی گئی ہے۔ محکمہ داخلہ پنجاب نے 8 نومبر تک توسیع کا نوٹیفکیشن جاری کر دیا ہے۔
محکمہ کے ترجمان نے بتایا کہ صوبے میں ہر قسم کے احتجاج، جلسے، جلوس، ریلیاں، دھرنے اور دیگر عوامی اجتماعات پر پابندی برقرار رہے گی۔ دفعہ 144 کے تحت چار یا اس سے زائد افراد کے عوامی مقامات پر جمع ہونے پر مکمل پابندی ہوگی۔
ترجمان کے مطابق اس دوران اسلحے کی نمائش، لاؤڈ اسپیکر کے استعمال، اشتعال انگیز، نفرت آمیز یا فرقہ وارانہ مواد کی اشاعت اور تقسیم پر بھی مکمل پابندی ہوگی۔
محکمہ داخلہ نے واضح کیا کہ دفعہ 144 کے نفاذ میں توسیع کا مقصد امن و امان قائم رکھنا اور انسانی جانوں و املاک کے تحفظ کو یقینی بنانا ہے۔
پابندی کے بعض استثناءات بھی ہیں: شادی بیاہ کی تقریبات، جنازے اور تدفین اس سے متاثر نہیں ہوں گے، سرکاری افسران، اہلکار اور عدالتیں پابندی سے مستثنیٰ ہوں گے، جبکہ لاؤڈ اسپیکر صرف اذان اور جمعہ کے خطبے کے لیے استعمال کیے جا سکتے ہیں۔
