سہون حادثہ،عظمیٰ بخاری نےسندھ حکومت کوتنقیدکانشانہ بناڈالا
وزیراطلاعات پنجاب عظمیٰ بخاری نے سہون شریف حادثے کےبعد سندھ حکومت کو تنقیدکانشانہ بناڈالا۔
صوبائی وزیر اطلاعات عظمیٰ بخاری کا پریس کانفرنس کرتے ہوئے کہنا تھا کہ اگر سندھ اربوں کے فنڈ سے اپنی سڑکیں نہیں بنا سکتا تو پھر آپکا اللہ ہی حافظ ہے۔پنجاب حکومت کے 90 فیصد منصوبے اپنے فنڈز سے مکمل ہو رہے ہیں، سیہون میں وزیراعلیٰ سندھ کے علاقے میں ہونے والے حادثے کو وفاق پر مت ڈالا جائے، پچھلے 16 سال سے سندھ پر پیپلز پارٹی کی حکومت ہے مسلم لیگ ن کی نہیں۔
عظمی بخاری نے کہا کہ سندھ نے جو 956 ارب کا ترقیاتی بجٹ منظور کیا تھا اللہ کرے وہ جلد از جلد لگ جائے، مالی سال ختم ہونے والا ہے ابھی تک وزیراعلیٰ سندھ اپنے علاقے کی گلیاں اور سڑکیں اور ہائی وے نہیں بنوا سکے۔
وزیر اطلاعات عظمیٰ بخاری کا کہنا تھا کہ ڈمپرز روزانہ کی بنیاد پر کراچی کے شہریوں کو اڑا رہے ہیں کیا وہ بھی وفاق کا مسئلہ ہے؟ وفاق سے ہر سال معمول کے مطابق سندھ کو ان کے حصے کے فنڈز ملتے ہیں، اگر سندھ ان اربوں روپے کے فنڈز سے بھی اپنی سڑکیں نہیں بناسکتا تو پھر آپکا اللہ ہی حافظ ہے۔
لیگی رہنما نے کہا کہ وفاق اور صوبوں کے معاملات میں چچا بھتیجی کے رشتے کا کیا تعلق اور اسکا حوالہ کیوں ؟ مریم نواز پنجاب میں اپنے صوبے کے وسائل سے درجنوں بڑی سڑکیں مکمل کرچکی ہیں، مراد علی شاہ واحد وزیراعلیٰ ہیں جن کو اپنے حلقے میں کام کروانے کے لیے بھی وفاق کی ضرورت پڑتی ہے۔
وزیر اطلاعات کا مزید کہنا تھا کہ وزیراعلی سندھ اپنے نئے ترجمانوں کو زمینی پر بریفنگ بھی دیں، ان ناتجربہ کار ترجمانوں کو جو جھوٹی سچی پرچیاں دی جاتی ہیں یہ وہ وہی بول دیتے ہیں، جب کارکردگی اور کام بولتے ہوں تو ترجمانوں کا لاؤ لشکر رکھنے کی ضرورت نہیں پڑتی، کارکردگی اچھی ہوتو کام بولتا ہے جیسے مریم نواز کا کام بول رہا ہے۔
