آرمی چیف جنرل عاصم منیر کا تقرر روکنے کی خاطر پچھلے برس ان کے خاندان کا ڈیٹا لیک کروانے میں ملوث نیٹ ورک کی نشاندہی کے لیے جاری تحقیقات تیز کر دی گئی ہیں۔ سینئر صحافی اعزاز سید کی ایک رپورٹ کے مطابق اس انکوائری میں نیشنل ڈیٹا بیس رجسٹریشن اتھارٹی یعنی نادرا مجرموں کی شناخت کے لیے مرکزی کردار ادا کر رہی ہے۔

اعزاز سید کے مطابق غیر قانونی طور پر حاصل کی گئی معلومات کو گزشتہ نومبر میں موجودہ آرمی چیف کی تقرری کو روکنے کی کوشش میں استعمال کیا گیا تھا۔ یاد ریے کہ اکتوبر 2022 میں پانچ سینئر لیفٹیننٹ جنرلز کا پاکستان کے نئے آرمی چیف کے عہدے کے لیے مقابلہ تھا۔ اس دوران نادرا کے ایک جونیئر ڈیٹا انٹری آپریٹر فاروق احمد نے مبینہ طور پر جنرل عاصم منیر شاہ کے خاندان کی خاتون رکن کے ڈیٹا تک رسائی حاصل کی اور خاندان کی تفصیلات اور شناختی کارڈ نمبر اکٹھے کیے۔ اس ڈیٹا کو بعد میں فیڈرل انویسٹی گیشن ایجنسی کے انٹیگریٹڈ بارڈر مینجمنٹ سسٹم میں خاندان کے بین الاقوامی سفری مقامات کا پتہ لگانے کے لیے استعمال کیا گیا، موجودہ وزیراعظم نے جھوٹے دعوے کے ماخذ کی نشاندہی کے لیے تحقیقات کا آغاز کیا جو حکام کو نادرا میں غیر قانونی ڈیٹا رسائی تک لے گئی۔

اعزاز سید کے مطابق نتیجے کے طور پر نادرہ کے ملازمین فاروق احمد (جونیئر ایگزیکٹو)، رحمان بٹ (ڈپٹی ڈائریکٹر)، رشید احمد (اسسٹنٹ ڈائریکٹر)، سیف اللہ (ڈپٹی اسسٹنٹ ڈائریکٹر)، ساجد سرور (اسسٹنٹ سپرنٹنڈنٹ) اور ایم علی (ڈپٹی اسسٹنٹ ڈائریکٹر) کو معطل کر دیا گیا اور چیئرمین نادرا طارق ملک نے ان کے خلاف انکوائری کا حکم جاری کر دیا۔  ابتدائی طور پر انکوائری کی نگرانی ریٹائرڈ بریگیڈیئر خالد لطیف نے کی، جو بعد میں لیفٹیننٹ جنرل فیض حمید کے قریبی ساتھی پائے گئے، جو ملزموں میں سے ایک نکے۔ بعد میں لطیف کو مفادات کے ٹکراؤ کی وجہ سے سینئر افسر علی جاوید سے تبدیل کر دیا گیا تھا۔

انکوائری کے دوران نادرا کے دو افسران خالد عنایت اللہ اور امیر بخاری کو ڈیٹا تک رسائی کے اہم کردار کے طور پر شناخت کیا گیا۔ دونوں افسران نے مبینہ طور پر مقابلہ کرنے والوں کے قریبی رشتہ داروں کو ڈیٹا کی طلبی کی درخواست کرنے والوں کے طور پر نامزد کیا۔  توقع ہے کہ جاری انکوائری سے جلد ہی اس کہانی میں ملوث نادرا کے اصل چہرے بے نقاب ہوں گے۔ تاہم افسران کے پیچھے اصل ماسٹر مائنڈز کو شاید عوامی سزا کا سامنا نہ کرنا پڑے۔ نادرا انتظامیہ کے ایک اعلیٰ عہدیدار نے معاملے کی حساسیت اور تحقیقات کی جاری نوعیت کا حوالہ دیتے ہوئے بغیر کسی نام کا انکشاف کیے انکوائری کی تصدیق کی۔

واضح رہے کہ ادارے کے چھ جونیئر اسٹاف کو تاحال ان کے عہدوں پر بحال نہیں کیا گیا ہے۔ مزید برآں، حال ہی میں بریگیڈیئر ریٹائرڈ خالد لطیف اور تین دیگر فوجی اہلکاروں کو مستعفی ہونے کا موقع دیا گیا ہے۔ جاری انکوائری کی روشنی میں نادرا انتظامیہ کے اعلیٰ عہدیداروں میں سے ایک نے معاملے کی حساسیت کے پیش نظر اپنا نام ظاہر نہ کرنے کی درخواست کی اور کسی بھی اعلیٰ عہدیدار کا نام لینے سے انکار کرتے ہوئے کہا کہ وہ کچھ نہیں کہہ سکتے کیونکہ انکوائری ابھی جاری ہے۔ ایک اہم سرکاری اہلکار کا دعویٰ ہے کہ اس واقعے اور کچھ دیگر اہم واقعات سے اس ڈیٹا کے محافظ ادارے میں کچھ اعلیٰ عہدیداروں کی نوکریاں ختم ہو سکتی ہیں۔

تہتر کا آئین غریب کی جورو