پاکستان تحریک انصاف کے اراکین اسمبلی نے سابق وزیراعظم عمران خان کے نامزد کردہ ملزمان کیخلاف کی نئی ایف آئی آر کے اندراج کے لیے سپریم کورٹ میں درخواست دائر کر دی ہے۔پیر کو پاکستان کی عدالت عظمیٰ، سپریم کورٹ لاہور اور پشاور رجسٹری میں دائر درخواست میں عمران خان پر حملے کی نئی ایف آئی آر درج کرنے، اعظم سواتی پر تشدد اور ارشد شریف کے قتل کی تحقیقات کا مطالبہ کیا گیا ہے۔

سپریم کورٹ لاہور رجسٹری کے باہر میڈیا سے گفتگو کرتے ہوئے تحریک انصاف کے رہنما شاہ محمود قریشی نے کہا کہ عمران خان قاتلانہ حملے میں محفوظ رہے، اس حملے کی ایف آئی آر درج نہیں ہو رہی، ہم چیف جسٹس سے درخواست کر رہے ہیں کہ جوڈیشل کمیشن تشکیل دیں۔

گوادر کی حق دو تحریک 19ویں روز میں داخل، سی پیک بند کرنے کی دھمکی

انہوں نے کہا کہ ’بہت سے اہم واقعات رونما ہوئے ہیں، اعظم سواتی پر تشدد اور ارشد شریف کے قتل کی تحقیقات ہونی چاہییں ادھر سپریم کورٹ پشاور رجسٹری میں درخواست دائر کرنے کے بعد میڈیا سے گفتگو کرتے ہوئے پاکستان تحریک انصاف کے صوبائی وزیر شوکت یوسفزئی نے کہا کہ اس ملک میں انسانی حقوق کی پامالی ہو رہی ہے، چیف جسٹس ان واقعات کا نوٹس لیں۔

تین نومبر کو پاکستان تحریک انصاف کے لانگ مارچ کے دوران عمران خان کے کنٹینر پر وزیر آباد میں اللہ والا چوک کے قریب فائرنگ ہوئی تھی جس میں سابق وزیراعظم سمیت متعدد افراد زخمی ہوئے تھے، سپریم کورٹ نے پنجاب پولیس کے سربراہ کو فائرنگ کے واقعے کا مقدمہ قانون کے مطابق 24 گھنٹے میں درج کرنے کے احکامات جاری کیے تھے۔

پانچ دن کی تاخیر سے مقدمہ وزیر آباد کے تھانہ کنجاہ میں پولیس کی مدعیت میں درج کیا گیا جس میں قتل، اقدام قتل اور دہشت گردی کی دفعات شامل کی گئیں۔پی ٹی آئی کے رہنماؤں نے اس ایف آئی آر پر عدم اطمینان کا اظہار کیا تھا اور کارکنان کی جانب سے احتجاجی مظاہرے بھی کیے گئے۔

سپریم کورٹ لاہور رجسٹری میں درخواست شاہ محمود قریشی، عثمان بزدار، شفقت محمود اور دیگر اراکین پارلیمان کی جانب سے دائر کی گئی ہے، درخواست میں اعظم سواتی کے واقعے پر کارروائی کرنے اور ارشد شریف کے پسماندگان کی داد رسی کی استدعا بھی کی گئی ہے۔

عثمان بزدار نے درخواست ڈپٹی رجسٹرار سپریم کورٹ اعجاز گورائیہ کے پاس جمع کروائی، ڈپٹی رجسٹرار نے تحریک انصاف کی آئینی درخواست وصول کرکے درخواست کا ڈائری نمبر فراہم کر دیا۔
موقف اپنایا گیا کہ تحریک انصاف کے رہنماؤں نے جوڈیشل کمیشن بنانے کی درخواست دائر کی ہے، سپریم کورٹ ان معاملات پر سوموٹو نوٹس لیکر کاروائی کرے، پی ٹی آئی نے مختلف واقعات کی تحقیقات کے لیے سپریم کورٹ کراچی رجسٹری میں بھی درخوات دائر کر دی، رخواست پر 26 ایم این ایز اور ایم پی ایز کے دستخط موجود ہیں۔

درخواست میں موقف اپنایا گیا کہ عمران خان پر حملہ، اعظم سواتی کی مبینہ ویڈیو اور ارشد شریف کے قتل کی عدالتی تحقئقات کروائی جائیں، اب تمام واقعات کیلئے جوڈیشل کمیشن قائم کیا جائے، سابق وزیر اعظم عمران خان پر قاتلانہ حملے کی اعلیٰ سطح پر تحقیقات کروائی جائے۔

اسی طرح کی درخواست سپریم کورٹ پشاور رجسٹری میں ڈپٹی اسپیکر محمود جان، صوبائی وزراء عاطف خان، شوکت یوسفزئی، کامران بنگش، ڈاکٹر امجد، سینیٹر عثمان ترکئی اور خواتین ایم پی ایز کی جانب سے بھی جمع کروائی جائے گی۔