غیرملکی آقاؤں کے آلہ کاردہشت  گردوں کو شکست ہوگی،آرمی چیف

آرمی چیف جنرل سیدعاصم منیر نے کہا ہے کہ غیر ملکی آقاؤں کےآلہ کار جو دہشت گردی میں ملوث ہیں ان سے آگاہ ہیں اورنام نہاد دوست نما دشمن کچھ بھی کرلیں انہیں قوم کے تعاون سےپاک آرمی کےسامنے شکست ہوگی۔

آئی ایس پی آر کے مطابق چیف آف آرمی سٹاف جنرل سید عاصم منیر نے بلوچستان کا دورہ کیا،جہاں انہیں سیکیورٹی صورتحال پر جامع بریفنگ دی گئی، بریفنگ میں سینیئر عسکری اور انٹیلیجنس حکام بھی شریک ہوئے۔

ترجمان پاک فوج کے مطابق آرمی چیف، گورنراوروزیراعلیٰ بلوچستان نے شہید سیکیورٹی اہلکاروں کی نماز جنازہ میں شرکت کی اورزخمیوں کی عیادت کیلئےسی ایم ایچ کا دورہ کیا،جہاں جنرل عاصم منیر نےزخمی ہونےوالے فوجی جوانوں کی عیادت کی۔

واضح رہے کہ بلوچستان کےضلع قلات کےعلاقے منگوچر میں سیکیورٹی فورسز نے کارروائیوں کے دوران23 دہشتگردوں کو ہلاک کیا جب کہ جوابی کارروائی میں فورسز کے 18 اہلکار بھی شہید ہوگئے۔

آئی ایس پی آرکا کہنا تھا کہ پاک فوج کےسربراہ نےدہشتگردی  کیخلاف فورسز اور سکیورٹی اداروں کےکرداراور ملکی دفاع کیلئےسیکیورٹی اہلکاروں کےغیرمتزلزل عزم کو سراہا۔

آرمی چیف جنرل عاصم منیر نے کہا کہ دہشتگردوں اور ان کےسہولت کاروں کو قوم کے ساتھ ملکر شکست دیں گے،جب بھی جہاں بھی ضرورت پڑی دشمنوں کا قلع قمع کرنے کیلئے لازمی کارروائی کریں گے۔

ترجمان کے مطابق آرمی چیف کا کہنا تھا کہ غیرملکی آقاؤں کےآلہ کار جو دہشت گردی میں ملوث ہیں ان سےآگاہ ہیں، یہ عناصرمنافقت کادہرا معیار اپنا کر درپردہ دوسر ی طرف سے کھیل رہےہیں تاہم مادروطن اور عوام کےدفاع کیلئےہم یقیناً دہشت گردوں کا سراغ لگا کر انہیں انجام تک پہنچائیں گے۔

جنرل عاصم منیر نے مزید کہا کہ دوست نما دشمن کچھ بھی کرلیں انہیں قوم کے تعاون سے پاک آرمی کےسامنے شکست ہوگی۔

صدر مملکت آصف علی زرداری اور وزیراعظم شہباز شریف نے دہشت گرد حملے کی مذمت کی اور خوارج کیخلاف بروقت کارروائی کرتے ہوئے جامِ شہادت نوش کرنے پر شہدا کو خراج عقیدت پیش کیا۔

گزشتہ 24 گھنٹوں کے دوران بلوچستان کےضلع قلات کے علاقے منگوچر میں سیکیورٹی فورسز نے یکم فروری کی رات کو کارروائی کرتے ہوئے 23 دہشت گردوں کو ہلاک کردیا، آپریشن کے دوران سیکیورٹی فورسز کے 18 اہلکار بھی شہید ہوگئے۔